Maio Cultural no Concello de Ribeira

As concelleiras Antía Alberte, Cruz Rivadulla, Francisco Suárez-Puerta e Fernando Abraldes presentaron hoxe a programación do Maio Cultural 2024 no Concello.

O Maio Cultural trátase dunha programación completa por ser o mes das letras por excelencia, mes no que celebramos o Día das Letras Galegas e no que é habitual que dende as áreas de Educación e Cultura se organicen distintas actividades vencelladas á promoción da lingua galega e á difusión e posta en valor da nosa cultura e todas elas gratuítas. Por iso no acto estivo presente a concelleira desa área Cruz Rivadulla, que tamén debullará polo miúdo algunhas das accións destinadas á poboación infantil e familiar.

A primeira das propostas, e coa que se abre a programación, é a inauguración este xoves día 2 ás 20:30 h da Décimo cuarta edición da Bienal de Pintura do Eixo Atlántico. Tras pasar por cidades como Braga ou Maia, esta mostra chega agora a Ribeira, para amosarnos os 25 traballos seleccionados de entre os máis dun cento de artistas que se presentaron á convocatoria.

Tamén contaremos no mes de maio, grazas á colaboración coa Deputación da Coruña,  coa proxección do documental de Alberto Sacido baseado no escritor Suso de Toro. Teremos a oportunidade o 4 de maio ás oito no auditorio de ver este filme e participar nun coloquio posterior co director e co propio Suso de Toro.

O día 15, coincidindo co pasamento do fillo adoptivo de Ribeira Manuel Ayaso, terá lugar un pequeno acto solemne na súa lembranza. Será ás oito da tarde no cemiterio municipal e contaremos coa participación de varios escritores e poetas que recitarán versos na súa memoria e unha pequena interpretación musical.

Outra data destacada será ao día seguinte, o 16 de maio, xa que ás oito e media no Centro Cultural Lustres Rivas presentarase a novela premiada na novena edición do certame de novela curta “Cidade Centenaria de Ribeira” que recaeu no escritor Manuel Esteban coa obra “O xogo de Escher”. A todas as persoas que acudan á presentación agasallaráselles cun exemplar da obra. Ademais, aproveitando a convocatoria para asinar unha nova edición do convenio de colaboración coa editorial Xerais para a posta en marcha da décima edición deste concurso literario.

Na propia xornada do 17 de maio, Día das Letras Galegas, haberá varias accións como non podía ser doutro xeito. Teremos un espectáculo infantil con Pablísimo ás 12 na praza de Porta do Sol, unha ruada de música tradicional polas rúas da cidade a cargo da agrupación Tahume, a xornada das letras que se organiza en Aguiño da man da asociación Francisco Lorenzo Mariño e para pechar o día a coral municipal ofrecerá un concerto ás oito e media no auditorio municipal.

Xa no día 18 a compañía Redrum Teatro traeranos ao auditorio a obra “O pequeno Poni” e remataremos o mes de maio o día 31 cun acto tamén no auditorio no que se entregarán os premios do escolar literario das letras galegas aos escolares gañadores en cada categoría e serán agasallados tamén co espectáculo “A Danza do Verán” de Xoán Curiel”.