Exhibicións, inchábeis e churrascada para despedir o curso das escolas deportivas de Vimianzo

O alumnado das escolas deportivas despídese do curso 2023/2024 cunha xornada na que haberá exhibicións, inchábeis e churrascada.

Será o vindeiro venres, 31 de maio, cando os rapaces e rapazas poidan gozar dun día diferente ao mesmo tempo que teñen a oportunidade de demostrar todo o aprendido durante todos estes meses de traballo ao público.

Dará comezo a partir das 17:00 horas no pavillón polideportivo cunha mostra do alumnado de patinaxe artística, taekwondo e tiro con arco.

A partir das 18:30 horas a Praza do Concello encherase de inchábeis para a cativada e, neste mesmo espazo, a partir das 20:30 horas, haberá unha churrascada para todos os alumnos e alumnas das escolas.

Ese día, co obxectivo de que as crianzas poidan participar nas actividades propostas se así o desexan, cancelaranse todas as clases das escolas deportivas.