Brión remata as obras de mellora dos accesos á aldea da Telleira, en Bastavales

O Concello de Brión vén de rematar os traballos de mellora dos accesos á aldea de A Telleira, situada na parroquia de Bastavales, nas cales investiu un total de 95.420 euros nunhas «obras que mellorarán a seguridade viaria dos veciños e veciñas, tanto peóns como condutores, xa que non só incluíron a mellora da capa de rodaxe da estrada senón tamén a súa ampliación e construción de cunetas formigonadas nunha zona que carecía delas, o que obrigaba á veciñanza a camiñar pola calzada”, según explicou o alcalde brionés, Pablo Lago.

Así, realizáronse obras sobre un tramo de 350 metros de estrada municipal, concretamente dende a marquesiña do autobús ata o remate das vivendas. «Estes traballos incluíron a construción dun tramo de 120 metros de cunetas formigonadas por ambas marxes do viario, mentres que nos restantes 230 metros se fixeron unicamente na marxe sur. Unhas cunetas construídas con zahorra, formigón e cun bordo de delimitación para mellorar a seguridade dos peóns e separalos do tráfico de vehículos», sinalan dende o Concello.

Precisamente baixo esta cuneta foi instalada unha rede de 480 metros para canalizar as augas pluviais, que inclúe 16 arquetas con sumidoiro e 3 arquetas de formigón con reixa. Así mesmo, procedeuse á limpeza de gabias e salvagabias para garantir a correcta drenaxe das augas e mellorouse a capa de rodaxe con 5 centímetros de aglomerado en quente, previo arranxo de fochancas con grava e un tratamento asfáltico semiprofundo. Uns traballos que completáronse coa correspondente sinalización horizontal da estrada, con pintado de liñas de borde e símbolos.

Según sinalou Lago Sanmartín “Con esta actuación, o Concello de Brión continúa co seu plan de mellorar os accesos e os interiores das distintas aldeas das distintas parroquias, actuacións que estamos facendo en aglomerado en quente para que duren no tempo e onde estamos construíndo sendas peonís aló onde sexa posible, para así dotar de maior  seguridade viaria aos nosos veciños e veciñas”.