Brión remata a mellora do parque infantil de Cornanda

O Concello de Brión vén de finalizar as obras de mellora no parque infantil de Cornanda, cun investimento de algo máis de 10.000 euros. Os traballos incluíron a instalación de novos xogos como un tobogán, un balancín, unha estrutura multixogos e un columpio mixto con dous asentos (un plano e outro de seguridade para bebés).

Ademais, o propio Concello procedeu á limpeza e reposición da area da superficie do parque, á substitución do valado perimetral por un novo de piñeiro silvestre, e á instalación dun banco de madeira nunha das esquinas para que as persoas adultas poidan descansar mentres vixían as súas crianzas.

O alcalde, Pablo Lago, salientou que «entre os nosos compromisos coa cidadanía estaba a mellora dos xogos e o valado do parque de Cornanda, que xa é unha realidade, así como as renovacións dos parques infantís de Chave e Boullón, e a construción de dous novos parques infantís en Gronzo e Nináns, que acometeremos nos vindeiros meses».

Según destacou a través dun comunicado, estas actuacións «forman parte do programa de conservación e posta a punto dos parques infantís que está a executar o Concello de Brión e que xa se traduciu na mellora dos parques infantís de Bastavales, Guitiande e Os Ánxeles, a cubrición do parque infantil da rúa Inxerido e a construción dun novo e gran parque infantil cuberto na rúa Tarrío».