Brión mellora a visibilidade dun concorrido paso de peóns en Lamiño

O Concello de Brión vén de realizar unha importante mellora na seguridade viaria para o alumnado do IES Brión e o CEIP de Pedrouzos coa instalación de sendas sinais luminosas nun paso de peóns emprazado en Lamiño, concretamente ubicado na unión do ramal de saída da AG-56 Santiago-Brión coa estrada autonómica AC-541, a carón da rotonda. «Un camiño moi utilizado pola veciñanza que acude ao Paseo do Rego Pego, ao parque canino e, sobre todo», sinalan dende o Concello, así coma polo alumnado que vive a menos de 2 quilómetros do instituto ou do colexio e que se desprazan camiñando aos centros educativos ao non ter dereito a transporte escolar.

O alcalde, Pablo Lago, explicou que “tras varias chamadas, informes e escritos presentados polo Concello de Brión diante da Xunta de Galicia, finalmente vemos realizada unha mellora moi importante para a seguridade peonil dos nosos veciños e veciñas, especialmente dos moitos rapaces e rapazas que utilizan este camiño a diario para ir ao IES Brión ou ao CEIP de Pedrouzos”.

Nesta liña, Lago agradeceu á Axencia Galega de Infraestruturas que procedera, primeiro, ao repintado das marcas viarias na zona e que esta semana rematara a actuación instalando dúas sinais luminosas de paso de peóns, para mellorar a visibilidade dos camiñantes por parte dos numerosos condutores que utilizan esta estrada, pois é a conexión de acceso e saída da autovía Santiago-Brión. “Unha situación que era especialmente preocupante tanto nas primeiras como nas últimas horas do día, polo que celebramos a medida adoptada pola Xunta”, sinalou o alcalde brionés.