Ames, Brión, Dodro e Padrón crean a Ruta Rosaliana

A Ruta Rosaliana – As pegadas de Rosalía, que percorre os concellos de Ames, Brión, Dodro e Padrón, foi presentada oficialmente esta semana nun acto que tivo lugar na Casa de Rosalía, coa presenza dos alcaldes dos catro municipios.

Os alcaldes de Ames, Blas García; Brión, Pablo Lago; Dodro, Xabier Castro; e Padrón, Anxo Rey, asinaron esta mañá na sede da Fundación Rosalía o convenio polo cal os catro concellos acordan desenvolver e xestionar a Ruta Rosaliana – As pegadas de Rosalía, un itinerario que percorre lugares intimamente vencellados á vida e á obra de Rosalía de Castro e que inaugurarase o sábado 14 de setembro, e a participación está aberta a todas as persoas interesadas.

Os rexedores aprobaron a creación dunha comisión mixta que xestionará a agrupación supramunicipal e todas as iniciativas e actividades que se desenvolvan para conservar e promocionar esta ruta rosaliana, así como o patrimonio material e inmaterial da súa contorna.

O acto tamén serviu para presentar a primeira das actividades: a realización da ruta en autobús cunha visita guiada e teatralizada, prevista para o sábado 14 de setembro. As inscricións, gratuítas, estarán abertas desde o luns 26 de agosto ata o martes 10 de setembro, mentres que as prazas para os dous autobuses dispoñibles (un que sairá de Dodro ás 9:30 horas e pasará por Padrón, e outro que sairá de Ames ás 9:30 horas e pasará por Brión e Ames) serán adxudicadas por orde de inscrición.

Ao remate da ruta, ao redor das sete da tarde, todas as persoas participantes, así como aquelas que queiran asistir ata completar o aforo, poderán gozar dun concerto de Manoele de Felisa na igrexa de Santa María de Iria Flavia.