A Ulla Viva informou sobre Altri nun acto en Teo

O colectivo A Ulla Viva organizou onte á tarde en Teo un acto informativo para divulgar a afectación que tería no río Ulla e nas persoas que viven na súa contorna a instalación da macrocelulosa que Altri e Greenalia teñen proxectada en Palas de Rei.

No acto participaron Sérgio Nunhes, do colectivo Santiso Vivo (zona directamente afectada pola instalación da factoría), Fins Eirexas, de ADEGA (Asociación para a Defensa Ecolóxica da Galiza) e Irene Tato, membro de A Ulla Viva. O evento celebrouse no Centro Cultural A Ponte Vella, e asistiron numerosos veciños e veciñas dos concellos afectados para informarse sobre o proxecto.

Durante a palestra, ofreceuse información detallada sobre o impacto da macrofábrica na bacía do río Ulla e na ría de Arousa. Especificamente, presentáronse datos do proxecto Gama (nome do proxecto de instalación da macrocelulosa na Ulloa) incluídos no Estudo de Impacto Ambiental. Estes datos evidencian a contaminación da auga e do aire, ademais da eucaliptización que afectaría o territorio nun raio de 100 quilómetros.

Tras as explicacións dos conferenciantes, abriuse un coloquio no que a veciñanza presente expresou a súa preocupación polos efectos negativos do proxecto. Concluíuse que é necesario mobilizarse contra este proxecto depredador.

Por iso, desde A Ulla Viva convidan a toda a veciñanza afectada, especialmente dos concellos de Teo, Vedra, A Estrada e Boqueixón, a mobilizarse e participar nas convocatorias das distintas plataformas e colectivos de defensa do Ulla. En particular, fan un chamamento a participar na acción convocada pola Plataforma Ulloa Viva e a Plataforma en Defensa da Ría de Arousa para o vindeiro 30 de xuño, arrodeando o Complexo Administrativo da Xunta en San Caetano.