3 mayo, 2024
O domingo, 5 de maio, Ameneiral será peonil. Só os vehículos que necesiten acceder aos garaxes, carga e descarga durante o horario establecido e os comerciantes autorizados para estacionar por un máximo de 15 minutos poderán transitar por esta rua no núcleo de Bertamiráns.
Para garantir que este cambio se produza de forma suave, o concelleiro de Mobilidade, Víctor Fernández, anunciou que durante a primeira semana de aplicación (do domingo, 5 de maio, ata o domingo, 12 de maio), a Policía Local de Ames realizará unha función informativa e non sancionadora: “Non pretendemos multar nin causar un cambio brusco para a veciñanza. Esta primeira semana será para adaptarse á nova situación da rúa e a Policía Local só informará”.
O alcalde de Ames, Blas García, sinala que “con esta decisión buscamos favorecer o tránsito peonil. Durante as obras de humanización de Ameneiral, vimos como, cando a rua estaba pechada ao tráfico, se convertía nunha rúa chea de vida. Iso é o que queremos lograr con esta decisión, devolverlle a vida ás rúas e que o peón recupere o seu espazo”.
Os vehículos autorizados deberán contar cunha tarxeta de identificación para poder acceder e estacionar na rúa durante un máximo de 15 minutos. Estas tarxetas só serán concedidas aos comerciantes que as soliciten. A maioría deles xa as pediu, pero se alguén aínda non o fixo, debe poñerse en contacto co gabinete de Alcaldía, a través do correo electrónico gabinete@concellodeames.gal ou chamando ao número de teléfono 881 07 47 30.