A Mancomunidade de Ordes promove a segunda edición do programa “Ter (en)conta» durante este verán

A Mancomunidade de Ordes, xunto cos sete Concellos que a integran, entre eles o Concello de Oroso, organizan o Programa “Ter (en)conta II” que se desenvolverá entre os meses de xullo e setembro, dándolle así continuidade á labor iniciada na primeira edición do programa, na que participaron máis de 60 mulleres da comarca.

A acción formativa será impartida por Andaina Pro Saúde Mental de Ordes. Entregarase un diploma de asistencia das horas recibidas.

Este proxecto está cofinanciado pola Xunta de Galicia e pola Unión Europea no marco do Programa FSE+ Galicia 2021-2027 e o seu obxectivo principal destas axudas é previr a violencia de xénero e mellorar a situación das vítimas de violencia de xénero e das mulleres en situación de especial vulnerabilidade.

Polo tanto, ao abeiro da programación vanse organizar as sesións grupais “Ternos en conta” e un ciclo de encontros.

No Concello de Oroso realizaranse seis obradoiros, de dúas horas de duración cada un deles entre ás 12:00 e ás 14:00 horas, durante os días 1, 15 e 29 de xullo, 12 e 26 de agosto e 9 de setembro, no Centro Cultural Fernando de Casas e Novoa.

Os contidos, teóricos e prácticos, que se van impartir son auto coñecemento, mobilización de persoas, recursos de axuda, corresponsabilidade, comunicación non violenta e ferramentas para a inclusión dixital.

O obxectivo é favorecer o auto coidado das persoas participantes e reducir os efectos negativos, especialmente os relacionados co estrés e a soidade. Ademais, estes obradoiros servirán para crear un espazo de encontro e intercambio de experiencias entre as persoas participantes.

Ademais, durante tres tardes do mes de setembro organizaranse tres encontros informativos e de axuda mutua para facilitar información sobres as patoloxías con máis incidencia entre as persoas maiores e menores de idade.

Estes encontros temáticos, que terán unha duración de dúas horas, versarán sobre os trastornos mentais, cognitivos e do desenvolvemento e o seu manexo. De xeito transversal abordaranse contidos sobre os estereotipos de xénero, a promoción da igualdade e a prevención da violencia

INFORMACIÓN E INSCRICIÓN

As actividades serán de balde e as persoas participantes poderán elixir o lugar e horario no que desexan asistir, con independencia do concello no que residan

Para máis información e inscricións están habilitados os servizos sociais comunitarios da comarca ou ao CIM a través do número 981 682 108 ou o mail cim@mancomunidadeordes.gal