31 mayo, 2024
Esta mañá inaugurouse na Casa da Cultura do Milladoiro a exposición itinerante do XVIII Certame de Arte Isaac Díaz Pardo, un dos premios á creación convocados pola Deputación da Coruña. Ao acto asistiron o alcalde de Ames, Blas García, e a deputada de Cultura, Natividade González, acompañados dunha ampla representación de concelleiros/as do goberno municipal e dos grupos municipais do PP e do BNG.
Despois de estar na Pobra do Caramiñal, a exposición chega ao Milladoiro, onde permanecerá ata o 18 de xuño. Nesta mostra exhíbese a obra gañadora do certame, xunto con 11 obras máis que concursaron e foron adquiridas para formar parte da colección da Deputación da Coruña, ademais de cinco pezas seleccionadas polo xurado.
No acto de inauguración, o alcalde de Ames, Blas García, destacou a importancia da actividade cultural no concello, que é coñecido pola súa rica oferta cultural. Agradeceu á Deputación da Coruña por elixir Ames como sede desta mostra e animou á veciñanza a visitar a exposición na Casa da Cultura do Milladoiro. Tamén puxo en valor a figura de Isaac Díaz Pardo como promotor da cultura galega e defensor da nosa lingua.
Por outra banda, a deputada provincial de Cultura, Natividade González, agradeceu a colaboración dos concellos na promoción das propostas culturais do seu departamento. Salientou que sen a cooperación dos concellos sería inviable achegar o traballo das creadoras e creadores, tanto galegos como de relevancia internacional, aos municipios coruñeses. Tamén destacou a importante presenza de mulleres na mostra, con 10 das 17 artistas participantes.
A exposición exhibe a obra gañadora «erre melón», de Berio Molina, e outras once obras adquiridas para a colección da Deputación: «Autorretrato», de Enrique Lista; «Man under the shade», de Damián Ucieda Cortés; «#3, da serie Himno», de Juan López; «Escrito en las hojas, 11», de Verónica Vicente; «Testigos de confianza», de Rebeca Lar; «Historioporosis», de María X. Fernández; «Non só animal», de Alejandra Pombo Su; «Grafito sobre papel (II)», de Cillas Rodríguez Bernal; «Horizonte/f3», de Juan Lesta; «Pulsaciones II (fragmentos 61, 62 e 63)», de Ana Gesto; e «Banle#03#, paisaxe tipográfico», de Andrés Dearca. Inclúe tamén cinco pezas seleccionadas polo xurado: «Libri Consolationis as Patrem Meum», de Ana Pillado Vega; «Sin título. Da serie Deseños expandidos», de Héctor Francesch; «Plena», de Andrea Costas; «[Drawing Machine] […] with the Sound of its Own Making», de Marco Costa Moreira; e «Tengo un sofá amarillo (que es lo que se lleva ahora)», de María Meijide.
Así, logo do seu paso polo Milladoiro (ata o próximo día 18 de xuño), a exposición continuará a súa itinerancia por outras oito localidades da provincia da Coruña: Narón (Pazo da Cultura, do 20 de xuño ao 9 de xullo), Ortigueira (Claustro do Concello, do 1 ao 20 de agosto), Culleredo (Aula da Natureza, do 22 de agosto ao 10 de setembro), Noia (Casino, do 12 de setembro ao 1 de outubro), Outes (Casa da Cultura, do 3 ao 22 de outubro), Ribeira (Centro Lustres Rivas, do 24 de outubro ao 12 de novembro), Porto do Son (Casa da Cultura, do 14 de novembro ao 3 de decembro) e Cee (Casa da Cultura, do 4 ao 19 de decembro).