18 mayo, 2024
A profesora Mª Jesús Álvarez Ramos recibiu na Casa da Cultura da Baña o III Premio Daniel García Ramos. Este galardón, instituído polo propio Concello da Baña co gallo do Día das Letras Galegas, busca recoñecer o traballo en favor da lingua e da cultura galegas. Este ano, destaca o gran labor que Mª Jesús Álvarez realizou durante vinte anos como mestra no CPI de San Vicente, onde deixou unha profunda pegada en varias xeracións de bañenses e guiou a súa traxectoria educativa, ademais de exercer como xefa de estudos do colexio.
A tenente de alcalde, Mónica González Blanco, subliñou: “Con este premio non só se pretende recoñecer a súa traxectoria profesional, senón tamén mostrar o orgullo que sentimos de que unha bañesa, porque Chus ten sangue bañesa xa que a súa familia materna é natural de San Vicente, continúe coa profesión familiar. A súa nai e as súas cinco tías foron mestras, polo tanto, forman unha saga de mulleres dedicadas ao ensino”.
No acto estiveron presentes o alcalde, José Antonio Pereira Gil, membros da Corporación; a directora do CPI San Vicente, Mar Sueiro; o ex alumno e agora profesor da USC, Bruno Esperante; así como numerosos veciños e veciñas da Baña, incluíndo excompañeiros e exalumnos da homenaxeada.
Mónica González lembrou o percorrido profesional de Mª Jesús Álvarez, quen, tras licenciarse en Xeografía e Historia pola USC, traballou dúas décadas na Baña e actualmente exerce no IES Arcebispo Xelmírez, na modalidade de Educación para Adultos.
Mar Sueiro afirmou: “Estamos aquí para celebrar que Chus pasou polas nosas vidas”, destacando o “respecto” como unha das principais ensinanzas que a homenaxeada transmitiu aos seus alumnos durante o seu tempo na Baña. Bruno Esperante, con agarimo, asegurou: “Se hoxe son historiador é grazas a ela e á súa paciencia”. “De parte de toda a nosa xeración, Chus, moitas grazas”, transmitiu á mestra.
Pola súa parte, a galardoada, visiblemente emocionada, agradeceu ao Concello esta distinción e, nun emotivo discurso, recordou “ás mulleres da miña vida”, comezando pola súa avoa, todas integrantes dunha saga de mestras. Ademais, destacou que na Baña completou a “etapa máis importante da miña vida” e compartiu a distinción cos seus excompañeiros do CPI San Vicente, amosando o seu orgullo polos seus antigos alumnos. “O mellor agradecemento que podo recibir é o agarimo dos meus rapaces cando veño á Baña”, subliñou.
O acto contou con constantes alusións ao Día das Letras Galegas e á figura de Luisa Villalta, rematando coa actuación do alumnado da Escola de Música Tradicional da Baña, que interpretou o Himno Galego diante da Casa da Cultura.
Así, María Jesús Álvarez Ramos é a terceira persoa en recibir o Premio Daniel García Ramos, seguindo os pasos do mestre e músico Alonso Barreiro Caxade, galardoado en 2022, e Emilio Lois, profesor na Escola de Música Tradicional da Baña e promotor de varios grupos, galardoado en 2023.
Este premio honra a figura de Daniel García Ramos, maxistrado do Tribunal Superior de Xustiza de Galicia e fillo predilecto da Baña, quen destacou polo uso do galego nos procedementos xudiciais e pola defensa do rural.