A Baña contará con dúas novas antenas 5G

O alcalde da Baña, José Antonio Pereira, reuniuse na sede de Amtega en Santiago co director do organismo, Julián Cerviño, para abordar a necesidade de mellorar a cobertura móbil nas parroquias da Riba, Lañas e Cabanas. Na xuntanza, o director da Axencia para a Modernización Tecnolóxica de Galicia (Amtega) comprometeuse a agilizar os trámites para a instalación de dúas antenas 5G que proporcionarán cobertura móbil de voz e datos de alta velocidade nestas áreas actualmente desatendidas polas grandes operadoras.

Unha das antenas instalarase na Riba e a outra en Lañas e Cabanas, proporcionando servizo ás comunidades locais. A Baña, adherida ao convenio marco entre Amtega e a Federación Galega de Municipios e Provincias (FEGAMP) para mellorar a cobertura no rural, facilitará as parcelas para as novas torres e as infraestruturas eléctricas necesarias.

A reunión foi solicitada polo goberno local ante a demora no cumprimento do convenio, e nel participaron o alcalde e o concelleiro de Obras, Urbanismo e Medio Rural, Jesús Pena.