28 agosto, 2024
Hai uns días atraeu a miña atención o titular dunha noticia. Dicía “O Parlamento de Galicia declarouse inauditable cando o Consello de Contas (CC) fiscalizaba a súa xestión por primeira vez”.
Asumindo a veracidade da información publicada, a decisión foi tomada por unanimidade dos grupos (PP, PSdG e BNG) na “Mesa do Parlamento” o 30 de Xullo pasado -parece que non estaban de vacacións, ou querían irse de vacacións sen deixar “temas pendentes”?- e publicado no DOGA do 13 de Agosto -en plenas vacacións estivais-. Por suposto, cada grupo político alegando diversos e moi “razoados motivos”, como que “xa lles revisa as contas o Tribunal de Contas”, ou que “hai parlamentos doutras comunidades que tampouco son auditados” etc. Curioso.
Moi curioso. Na páxina web do Consello de Contas podemos ler que “O Consello de Contas de Galicia, ente fiscalizador das contas e da xestión económico-financeira do sector público galego, foi creado pola Lei Orgánica 1/1981, do 6 de abril, do Estatuto de Autonomía de Galicia”. Pois resulta que nunha entidade pública como é o Parlamento de Galicia declárase “inauditable”, como os cidadáns estamos de vacacións, e non había asuntos máis prioritarios que resolver para o pobo, ás súas señorías ocórrelles declararse “inauditables”.
1.- Por unanimidade. Para estes temas rápidamente chegan a acordos. Para outros temas nos que os políticos deben poñerse de acordo, os cidadáns temos que esperar anos – lustros, e sufrir as consecuencias da súa falta de resolución.
2.- Neste caso con “vacacións e aleivosía”, diría eu…. Para que a noticia pase desapercibida. Claramente.
3.- E curiosamente, toman a decisión para que non lles “pille o touro”, xusto agora, que ían ser auditados nas súas contas de 2023 por primeira vez, 42 anos despois de que o CC fose creado. Porque o CC foi creado por lei en 1981 (recordo que usaba pantalóns curtos máis a miúdo que agora). Xa lles vale tamén ós do CC coa sua axilidade en poñerse a facer o seu traballo.
Entón é cando xorden algunhas preguntas:
1.- Se non hai nada que esconder, por que non deixo que me auditen?
2.- Por que é tan importante, para todos os grupos políticos de forma unánime, declarar a “inauditabilidade” do Parlamento de Galicia? Que teñen en conivencia TODOS os grupos?
3.- Por que os cidadáns e as entidades privadas non nos podemos declarar, tamén, “inauditables”? Á fin e ao cabo, nun estado con recoñecemento da propiedade privada, seriamos “inauditables” sobre o uso do noso propio diñeiro e propiedades. A diferenza dos nosos representantes e gobernantes, que usan o diñeiro de todos, pero que non queren que saibamos en que.
Temos unha “caste” política e gobernante que non ten outro cualificativo que a de ser una vergoña. Igual é o que nos merecemos…. Pero sen dúbida, é o que temos.
Eu tamén quero ser “inauditable”.