Jacobo Senín suma un novo triunfo na montaña galega, nesta ocasión na subida a Taboadela

Jacobo Senín, aos mandos da Nova Proto, foi o vencedor da Subida a Taboadela, sexta e penúltima proba puntuable para o Campionato Xunta de Galicia de montaña.

Baixo unha forte calor que xa acompañou aos equipos participantes e ao abondoso público que se achegou ata a rampa galega, o piloto da Escudería Estradense foi o mellor nas catro mangas cronometradas, o que lle permitiu marcar un crono final de 2:48.563.

No segundo chanzo do podio, a 17.3 segundos de Senín situouse Alexis Vieitez, novamente no Fórmula Celtic Dicode, mentres que a terceira praza foi para Jorge Pérez Alonso, vencedor ademáis entre os carrozados.

Completaron os cinco primeiros clasificados da xeral, Javier Carballo e Francisco Javier Casqueiro, no Porsche 991 GT3 e no Volkswagen Golf TCR (2º e 3º dos carrozados, respectivamente).

Dentro da sempre competida clase 9, reservada para vehículos carcross, primeira posición para Beni Porto no LaBase, seguido de Alfonso “Pisko” Ventín co Yacar e de Abrahán Vázquez, que reparou o motor do seu Yacar, para poder competir nas mangas do domingo.

Mateo García, o piloto becado pola Federación Galega de Automobilismo e que na cita ourensá estreaba o patrocinio do World RX de Montalegre foi quinto clasificado da clase 9.

No Desafío Kumho Montaña, primeira posición para Antonio Cid, no Renault Clio.

Entre os inscritos de regularidade, triunfo en Taboadela para Iván e José Antonio López con 9750 puntos, seguidos de Breogán Abalde e Cristian Castro e de Diego Jesús Rodríguez e José Luis Ucha.

A derradeira proba puntuable para o Campionato Xunta de Galicia de Montaña terá lugar en Ponte Caldelas os días 6,7 e 8 de setembro.