12 agosto, 2024
O pasado sábado 10 de agosto, máis de 50 persoas puideron desfrutar dun paseo polos camiños do ceo e aprender a recoñecer os distintos elementos que o compoñen. Ese era o obxectivo principal da actividade Noite de Estrelas, enmarcada na programación estival da Aula da Natureza.
Os asistentes, que na súa maioría empregaron o servizo de autobús ofrecido pola organización, achegáronse á lúa, ás galaxias, ás constelacións e descubriron planetas como Venus, Saturno ou Xúpiter guiados polo experto astrónomo Antón Bouzas. Así mesmo, afondaron nas diferentes disciplinas da astronomía, como a observación práctica, cultos e mitos, calendarios, representación simbólica de eventos, etc; é dicir, achegáronse ao coñecemento das percepcións humanas do ceo e a relación con diferentes aspectos da vida social.
O concelleiro de Xestión do Medio Rural, Javier Antelo, sinala que “estamos moi satisfeitos coa ampla participación que está a ter esta iniciativa, e seguiremos impulsando este tipo de actividades para que toda a veciñanza poida participar”.
Así mesmo, Antelo lembra que durante o mes de agosto haberá dúas saídas máis, desta volta nos núcleos urbanos: o 16 de agosto no anfiteatro fronte a igrexa do Milladoiro, e o 17 no paseo fluvial de Bertamiráns.