Nove de cada dez trámites coa Xunta fanse online

Os avances na dixitalización reflíctense no uso dos servizos dixitais por parte da cidadanía. Nove de cada dez trámites coa Xunta realízanse de xeito electrónico, segundo o balance de 2023 do III Plan de Administración e Goberno Dixital 2025, que busca achegar a Administración á cidadanía e impulsar servizos adaptados ás necesidades das persoas.

No pasado ano, o Rexistro Electrónico da Administración autonómica recibiu preto de 1,5 millóns de solicitudes, escritos ou comunicacións, de parte de case medio millón de persoas distintas. Para a atención presencial, a Xunta conta con 170 oficinas de atención á cidadanía e rexistro, onde se dixitaliza a documentación presentada presencialmente, se informa sobre procedementos e xestións, e se asiste na presentación electrónica a quen o solicite. En 2023, a Administración incorporou máis de 27 millóns de documentos electrónicos e creou máis de 641.000 expedientes de 530 procedementos distintos.

Na carpeta cidadá, xeráronse máis de 800.500 expedientes correspondentes a 474 procedementos distintos. Ademais, incorporáronse tres novos servizos que ofrecen atención personalizada no marco do novo modelo do nodo de datos cidadáns. Este modelo, anunciado en xullo, permitirá aos galegos e galegas consultar a situación dos seus trámites e actualizar os seus datos nun punto único.

A través da sede electrónica realizáronse máis de 63.000 pagos de taxas asociados á presentación de trámites. O sistema de identificación mediante Chave365 é utilizado por máis de 1,5 millóns de persoas. Tamén se incorporaron os sistemas Cl@ve da Administración Xeral do Estado e a identificación europea IDAS, que permite aos cidadáns doutros estados europeos identificarse electronicamente cos seus sistemas nacionais.

O Rexistro Electrónico Xeral de Apoderamentos de Galicia (REAG) foi utilizado por máis de 9.000 persoas para autorizar a terceiros a realizar trámites administrativos no seu nome. A Xunta puxo a disposición das persoas interesadas máis de 1,7 millóns de notificacións, das que cerca de 1,2 millóns foron exclusivamente electrónicas, alcanzando a máis de 580.000 persoas.

O balance tamén destaca que a aplicación XuntaEu, que facilita a relación da Administración coa cidadanía a través de dispositivos móbiles, foi descargada por máis de 35.000 persoas desde principios de 2023. Esta aplicación permite consultar a situación de expedientes, apoderamentos, citas, xestionar Chave365 e acceder a 16 carnés ou certificados.

Ademais, a Xunta conta cun catálogo de 282 portais, 35 aplicacións para dispositivos móbiles e 432 canles en redes sociais.