2 agosto, 2024
Xa está todo listo para o esperado inicio da XLIV Festa do Pemento, un evento recoñecido como Festa de Galicia de Interese Turístico que honra a un auténtico tesouro da gastronomía galega e do que Herbón repartirá uns 1.500 quilos e 3.500 racións
Así, os actos comezarán ás 9:00 horas coa saída do pasarrúas a cargo do grupo de gaitas Os Mersenarios e da charanga Noroeste. Ás 10:30 horas celebrarase unha misa campestre, seguida pola bendición e inauguración oficial da festa ás 11:00 horas. Media hora despois terá lugar a tradicional procesión agrícola motorizada, na que os tractores, numerados e decorados para a ocasión, desfilarán ata Padrón. Alí entregarán un cesto de pementos ao alcalde, Anxo Arca, no concello, e realizarán unha ofrenda floral á estatua da pementeira.
A celebración continuará ás 13:30 horas coa exaltación dos pementos de Padrón, un produto único e incomparable. Alberto Félix Traversa Correa, co-director da revista especializada La Alacena Roja, será o encargado de ler un pregón que resaltará non só o valor gastronómico deste produto, senón tamén a súa relevancia cultural e histórica para a comarca.
Despois do pregón, terá lugar a entrega de premios aos tractores participantes na procesión, nun acto presentado por Héctor Bermúdez de Radio Valga. A continuación, todos os presentes poderán probar os deliciosos pementos de Herbón, cun total de 1.500 quilos que se repartirán en aproximadamente 3.500 racións. Para degustalos, os asistentes deben comprar previamente un prato de barro de Buño conmemorativo da festa a un prezo de 5 euros, aínda que tamén haberá unha polbeira na carballeira para aqueles que o desexen.
A festa continuará durante todo o día cunha romaría animada polo grupo Os Mersenarios e a charanga Noroeste.