21 julio, 2024
O Concello de Val do Dubra e a Asociación Cultural Emigrante organizan un ano máis a festa Municipal “Emigrante 2024” dende o xoves 1 de agosto ata o sábado 3 de agosto.
O programa foi presentado na Casa do Concello de Val do Dubra polo alcalde de Val do Dubra, Diego Luis Díaz, a concelleira de cultura, Celsa Oreiro, e a presidenta e vicepresidenta da A.C. Emigrante, Mariña Bouzas e Concha González, respectivamente, acompañados de David Casais e Marco Baleato, tamén membros da asociación.
As festas comezan o xoves 1 de agosto coa tradicional Festa da Cervexa, que neste ano celebra a súa XXXVI edición e contará coa actuación dos grupos D’Crooners Band e Leite con Jalletas.
O venres 2, comezará cun acto oficial de inicio das Festas, o cal terá lugar diante da Casa do Concello ás 13.00 h. coa actuación da asociación dubresa de música tradicional Regueifa; será logo da misa solemne que será ás 12.00 horas.
Xa pola tarde teremos unha edición máis do JRAN PRIX: as peñas poderán desfrutar dunha serie de retos, tal e como se viña facendo noutras edicións, para logo rematares cunha cea organizada pola Asociación Cultural Emigrante en colaboración coa S.D. Dubra.
A partir das 23.00 h. comezará a verbena coas actuacións da orquestra Miramar e Cuarta Calle e da disco móbil Plan B.
O sábado 3 comezaremos pola mañá co Torneo de Petanca (detrás da rúa Arcai) e o pasarrúas coa charanga Os Jalácticos. Chegada a hora do xantar, gozaremos da sardiñada popular na Carballeira do Campo da Feira de Bembibre e pola tarde Torneo de Xadrez (na carpa situada nas inmediacións da Casa do Concello) e música de rúa e monicreques con “Os Monifates”.
Ás 19.00 h. Torneo de Fútbol Emigrante entre a SD Dubra – RC Deportivo (xuvenil división de honra).
O remate da Festa será sobre as 23.00 horas co concerto de Monoulious DOP e as actuacións de La Oca Band e da disco móbil EME Music.
Este ano, a Festa do Emigrante promete ser unha celebración inesquecible, con actividades para todas as idades e gustos. Invitamos a todos os veciños e visitantes a unirse a nós nestes días de festa e tradición.