Xuventude na Rúa 2024 en Porto do Son

O Concello de Porto do Son está a poñer en marcha a sexta edición do programa Xuventude na Rúa, destinado a mozos e mozas de entre 13 e 17 anos e que ten como obxectivo ofrecer actividades formativas e de lecer que permitan á mocidade gozar e coñecer as posibilidades do noso concello.

Este ofertará un gran número de actividades que inclúe obradoiros e actividades diferentes en cada xornada, todas elas entendidas como parte dunha proposta integral. A inscrición realízase para todo o programa, pero tamén se ofrecerán prazas vacantes en cada actividade en caso de que algún participante non poida asistir.

Entre as actividades propostas aparecen volei praia, piscina, pádel, surf, fotografía e graffiti. En caso de mal tempo, realizaranse actividades alternativas adaptadas ás circunstancias. Ademais, está prevista a organización dunha actividade nocturna denominada «Noite no Castro», que se engadirá á programación (data por determinar), ofrecendo así unha experiencia diferenciadora para os participantes.