Devolución de pezas tratadas na Escola de Conservación e Restauración

Fermín San Juan

A Escola Superior de Conservación e Restauración de Bens Culturais de Galicia colabora con institucións públicas na preservación do patrimonio cultural.

As pezas son tratadas polo alumnado do centro baixo a supervisión de especialistas en conservación e restauración. Seguindo este método de traballo, finalizou recentemente a intervención en dous modelos anatómicos educativos pertencentes ao Museo de Historia Natural de Galicia, situado en Ferrol.

Estes modelos anatómicos datan dos anos 60 ou 70, e foron fabricados mediante coada a molde en resina de poliuretano reforzada con fibra de vidro, segundo as análises de laboratorio. Os modelos estaban policromados e montados sobre taboleiro de aglomerado laminado. Presentaban un deterioro moi avanzado, especialmente na policromía, pero tamén no soporte plástico e no taboleiro, o que comprometía gravemente a súa conservación a medio prazo. A intervención, supervisada polo especialista Antón Pereira Abonjo, centrouse na limpeza e estabilización da policromía restante, así como na integración cromática e protección final. Os taboleiros de montaxe orixinais tamén foron tratados e recuperados.

Esta actividade é resultado do acordo de colaboración recentemente establecido entre a Escola e a Sociedade Galega de Historia Natural (SGHN), xestora do Museo de Historia Natural. Dentro deste acordo tamén se enmarca un recente Traballo de Fin de Grao da titulada Lucía Justo Martínez, que tiña por obxecto unha proposta de melloras para o almacén da SGHN.

A Escola Superior de Conservación e Restauración de Bens Culturais de Galicia é un centro oficial dependente da Xunta de Galicia, e é o único na comunidade que imparte esta formación, coas especialidades de conservación e restauración de bens pictóricos, escultóricos e arqueolóxicos.

Creada en 1991, a Escola é o segundo centro deste tipo máis antigo de España. Ademais de formar profesionais, a Escola colabora activa e altruistamente na conservación do patrimonio cultural da nosa comunidade.