15 julio, 2024
O pasado xoves 11 de xullo, tivo lugar unha sesión plenaria ordinaria no Concello de Touro, onde se debateu a moción do BNG contra a reapertura da mina de Touro. Na votación final, a moción non foi aprobada, o que evidenciou o posicionamento da maioría dos grupos políticos presentes.
Nesta liña, a Asociación de Mineiros de Touro – O Pino, que conta con máis de 1.800 membros, expresou o seu agradecemento polo apoio recibido desde o propio Concello de Touro. A asociación destaca que seguirán defendendo este proxecto mineiro, ao considerar que é fundamental para o desenvolvemento socioeconómico a longo prazo da comarca e para a recuperación ambiental definitiva dos terreos da antiga mina.
Non obstante, esta manifestou o seu profundo malestar polo posicionamento do alcalde de Touro, que rexeitou o proxecto mineiro. Critican que, como máxima autoridade do concello, o alcalde debería representar e defender os intereses xerais de toda a cidadanía e non só os dun grupo en particular.
Desde a Asociación de Mineiros consideran que a decisión do alcalde de rexeitar un proxecto tan importante para a comarca foi improcedente, xa que non tivo en conta as perspectivas e opinións da maioría dos veciños antes de tomar unha decisión de tal magnitude.
Finalmente, fai un chamamento aos representantes políticos para que gobernen con responsabilidade, poñendo os intereses xerais dos cidadáns por enriba das súas ideoloxías e intereses persoais, subliñando que o futuro do concello e da comarca está en xogo.