Tere Abelleira e Manu Fernández, os galegos nas seleccións de fútbol nos XXOO

Está sendo este un verán especialmente interesante e intenso no apartado futbolístico con grandes eventos como a Eurocopa e a Copa América. Un verán que terá o seu clímax en París coa celebración dos Xogos Olímpicos. O equipo español contará cun bo elenco de deportistas de Galicia e por suposto tamén teremos representación no noso deporte. A expedición futbolística terá doble representación en Francia pois acadaron a clasificación tanto a selección feminina como a masculina. E os dous equipos afrontan a competición coas máximas esperanzas.

Unha xogadora galega e un técnico galego, os dous de Pontevedra, son os nosos representantes na expedición futbolística. Teresa Abelleira volverá a ser unha das xogadoras referentes da selección feminina que parte coas máximas expectativas lucindo o seu título mundial. E no equipo masculino non haberá presenza no terreo de xogo, pero sí no cadro técnico. Manu Fernández, o director deportivo da Real Federación Galega de Fútbol, exerce como Xefe de Delegación da Selección Olímpica Masculina, cargo que xa viña desempeñando na selección Sub21.

Tere e Manu coincidiron onte no encontro olímpico celebrado na sede da RFEF en Las Rozas nunha cena distendida que serviu para conmemorar que por primeira vez na historia competirán as dúas seleccións nuns Xogos Olímpicos.

Categoría feminina

O equipo feminino que dirixe Montse Tomé terá como rivais a Xapón, Nixeria e Brasil.

Categoría masculina

O equipo masculino que dirixe Santi Denia leva concentrado desde o 1 de xullo. Uzbekistán, República Dominicana e Exipto son os outros equipos do grupo.