Máis de 200 integrantes de catro agrupacións daranse cita no XI Encontro de Música e Baile Tradicional na Pobra

A Pobra do Caramiñal, Ponte Caldelas, Viana do Castelo e Navalcán estreitarán lazos no XI Encontro de Música e Baile Tradicional. Este evento de confraternización arredor do folclore de distintas localidades de España e Portugal terá lugar o 13 de xullo, a partir das 21:00 horas, na praza Alcalde Segundo Durán, e congregará a máis de 200 integrantes da A.C.D. Xiada (A Pobra do Caramiñal), Banda de Gaitas Coribantes (Ponte Caldelas), Grupo de Danças e Cantares Serreleis (Viana do Castelo, Portugal) e A.C. Revolvedera (Navalcán, Toledo). A edición deste ano, dedicada aos pazos da Pobra, será presentada polo director do Museo Valle-Inclán, Antonio González.

«Nos últimos anos, este festival enmarcábase nas festas, pero este ano recuperamos o seu formato orixinal para animar este sábado de xullo. Trátase dun encontro consolidado no calendario municipal, que non só ofrece un intercambio cultural para as agrupacións participantes, senón que tamén permite que a xente desfrute da nosa tradición. A Pobra caracterízase polo seu tecido asociativo, que traballa arreo para poñer en valor a nosa cultura. Seguiremos apoiando estas iniciativas dende o Concello», explicou a concelleira de Cultura, Patricia Lojo.

María González, presidenta da A.C.D. Xiada, destacou que agora «toca vir á Pobra», despois de que a entidade pobrense participase na LVI Festa da Troita en Ponte Caldelas o 25 de maio e no XXXVII Festival de Folclore en Serreleis, Viana do Castelo, o 22 de xuño. Este intercambio cultural culminará en Navalcán, Toledo, na última fin de semana de outubro.