A Subida A Pontenova, con récord de inscritos

O Campionato Xunta de Galicia de Montaña afronta esta fin de semana (6 e 7 de xullo) a súa cuarta proba puntuable, nesta ocasión na localidade lucense de A Pontenova.

A progresiva recuperación do certame autonómico de montaña móstrase claramente no aumento no número de participantes, sendo nesta Subida a Pontenova de 57 equipos, case 20 máis que na pasada edición.

O trazado lucense, un dos mellores de todo o calendario autonómico polo seu trazado rápido e con boas medidas de seguridade, terá aos principais favoritos ao título autonómico na liña de saída, con Jacobo Senín, Alexis Vieitez, Jesús López, José Alonso Liste, Martín Villar ou o asturiano Pablo Vázquez.

Entre os carrozados, o principal candidato ao triunfo será o veterano asturiano José Antonio López Fombona aos mandos do Audi RS5 DTM, con permiso de Javier Carballo, Manuel Senra ou Rubén Blanco.

Ademáis, tamén estarán presentes os equipos inscritos no Desafío Kumho Montaña, no que Antonio Cid defende o primeiro posto da xeral, así como os participantes da categoría de regularidade, con Breogán Abalde e Ángel Monteagudo como o rival a batir.

En canto aos horarios da proba, as verificacións comezarán o sábado 6 de xullo as 09:00 horas da mañá, como comezo da proba marcada as 15:30 horas (1ª manga de adestramentos). A continuación terán lugar as dúas ascensións oficiais.

Para o domingo 7 de xullo, a competición dará comezo as 09:30 coa segunda das mangas de adestramentos para a continuación celebrar as dúas mangas oficiais restantes.

A entrega de premios será na Praza dos Fornos de A Pontenova xusto ao rematar a competición.