23 junio, 2024
O Pico Sacro acolleu este mediodía a lendaria Cerimonia do Lume Sagrado, tras catro anos de ausencia debido á pandemia e ás adversas condicións meteorolóxicas que só permitiron unha representación a pequena escala no pasado 2023. Hoxe, con sol brillante, o séquito da Raíña Alda incrementouse a case medio cento de persoas, incluíndo membros da Asociación da Fervenza do Castro de Callobre (A Estrada), visitantes vestidos para a ocasión e músicos do grupo folclórico local Son de Gaita (Sergude).
A posta en escena deste ritual celta comezou co encontro do séquito ao pé do Pico Sacro para celebrar o rito que os devanceiros realizaban para conmemorar a chegada do Solsticio de Verán. Encabezados pola Raíña Alda e polo seu Druída, o séquito desfilou ata a Capela de San Sebastián. Alí, fronte á ermida, o Druída utilizou o seu bastón, que contiña unha lupa no extremo, para concentrar a luz solar na ramaxe situada no pebeteiro, creando o Lume Sagrado grazas á forza do Astro Rei.
«Estas chamas serviron para acender as candeas que tanto a Raíña Alda coma os/as integrantes do seu séquito achegaron. Así mesmo, todos os veciños e veciñas de Boqueixón que o desexaron, de entre case un cento que seguiron con interese a representación, aproveitaron para levar cadanseu Lume Sagrado para acender, deste xeito, as cacharelas de San Xoán desta noite», sinalou o Concello.
Pola súa banda, o alcalde de Boqueixón, Ovidio Rodeiro, acompañado polo concelleiro de Turismo, José Luís Mareque, agradeceu a colaboración da Asociación da Fervenza do Castro de Callobre nesta actividade que, segundo dixo, “poñen o broche de ouro ao programa Un mes e Pico, no cal realizamos varias visitas guiadas para coñecer a xeoloxía e observar as estrelas desde este lugar, que foi escenario de coroación de reis visigodos, altar de Galicia e monte sagrado, antes e despois do cristianismo”. De igual forma, tamén animou aos presentes a explorar o interior do Pico Sacro participando nas baixadas espeleolóxicas programadas ata setembro.