20 junio, 2024
Xa se pode desfrutar na Alameda da exposición «Mira con outros ollos», impulsada pola Rede Galega de Apoio ás Persoas Refuxiadas para lembrar ás persoas migrantes e refuxiadas falecidas desde 1993. Esta mostra, que xa estivera no Paseo dos Leóns en 2021 e sufrira actos vandálicos, foi recuperada para enviar unha mensaxe clara contra o odio e a intolerancia. A concelleira de Dereitos e Servizos Sociais, María Rozas, destacou que «o Concello de Santiago non vai calar diante destas situacións».
Así, en conmemoración do Día Mundial das Persoas Refuxiadas, celebrado o 20 de xuño, a concelleira María Rozas visitou a exposición na Alameda, acompañada por outros membros da Corporación e representantes da Rede Galega de Persoas Refuxiadas. Durante a súa intervención, Rozas subliñou que a exposición «documenta as máis de 40.500 persoas migrantes e refuxiadas falecidas ata 2020, un número que en só catro anos aumentou ata os 60.600». Esta traxedia, dixo, «significa que cada mes morren 500 persoas, a maioría intentando chegar a Europa», uns datos que a concelleira cualificou de «inasumibles» e que «mostran o fracaso das administracións públicas».
No acto, Miguel Fernández leu o manifesto da Rede Galega de Apoio ás Persoas Refuxiadas, denunciando a difícil situación que viven millóns de persoas refuxiadas en todo o mundo debido a guerras, persecucións relixiosas ou políticas, e por razóns de xénero ou orientación sexual. Fernández tamén tivo un recordo para «as vítimas do xenocidio en Palestina, milleiros de persoas que nin sequera teñen a oportunidade de seren migrantes ou refuxiadas».