Inauguración da mostra ‘Instrumentos de visión’, de Armin Linke

O Instituto Galego de Física de Altas Enerxías (IGFAE), centro mixto da Universidade de Santiago de Compostela e a Xunta de Galicia, inauguran este venres 21 de xuño na Igrexa da Universidade a exposición ‘Instrumentos de Visión’, do artista Armin Linke. Esta colaboración co programa Arts at CERN da Organización Europea para a Investigación Nuclear conmemora o 25º aniversario do IGFAE e os 70 anos da fundación do CERN. A mostra está comisariada por Mónica Bello, directora de Arts at CERN desde 2015, e estará aberta ata o 28 de agosto.

‘Instrumentos de Visión’ recompila máis de 20 anos de traballo de Armin Linke, centrado na observación das investigacións realizadas en infraestruturas como o CERN, Laboratori Nazionali di Gran Sasso (Italia) e o Institute for Quantum Optics and Quantum Information (Áustria). Para esta ocasión, Linke tamén creou obras que reflicten o traballo científico do IGFAE, especialmente no experimento LHCb do CERN.

A exposición reflexiona sobre como os avances técnicos e científicos recentes revolucionaron a nosa percepción do espazo, o tempo e a materia. Grazas a estes progresos, desenvolvéronse instrumentos complexos que revelan o funcionamento dos compoñentes máis fundamentais da materia.

Na Igrexa da Universidade, o propio Linke convida ao público a explorar 16 obras que captan a dinámica dos laboratorios de física de partículas. ‘Instrumentos de Visión’ destaca o esforzo colectivo da ciencia, que implica investigadores, instrumentos, artefactos e materiais de laboratorio interconectados socialmente.

Este proxecto enmárcase na aposta do ArtLab do IGFAE por abrir novos espazos de conexión coa sociedade e fomentar unha investigación e innovación responsables. Así, ‘Instrumentos de Visión’ contribúe ao diálogo entre arte contemporánea e investigación do IGFAE.

A inauguración, que terá lugar mañá ás 19:30 na Igrexa da Universidade, contará coa presenza do artista Armin Linke a comisaria Mónica Bello e o director do IGFAE, Carlos Salgado. O sábado 22 ás 12:00, realizarase a conversa ‘A ciencia e a condición contemporánea’ con Linke, Bello e Salgado. Durante o período da exposición, haberá visitas guiadas abertas ao público.