19 junio, 2024
As obras de reurbanización da rúa do Pombal comezarán o próximo 25 de xuño, unha vez rematado o curso escolar, co obxectivo de minimizar o impacto na mobilidade. Estes traballos, que contan cun investimento superior aos 730.000 euros, mellorarán a accesibilidade e renovarán a rede de servizos, reflectindo así a aposta por un novo modelo urbano que prioriza a mobilidade peonil e ciclista mediante a ampliación das beirarrúas e a creación dun carril bici.
Os concelleiros de Obras, Xesús Domínguez, e de Mobilidade, Xan Duro, explicaron hoxe en rolda de prensa o proxecto e as súas repercusións no tráfico e no transporte urbano. Ao longo do día de onte, mantiveron diversas reunións con representantes dos centros educativos máis afectados polas obras (Pío XII, Raíña Fabiola e IES Rosalía de Castro) e das asociacións veciñais, ademais dun encontro aberto aos residentes da zona. Ambos os concelleiros pediron desculpas á veciñanza polas molestias ocasionadas polas obras, adxudicadas á UTE conformada por Oviga e Inside the Time, cun prazo de execución de 8 meses, prazo que é estimado e pode variar por condicionantes como a meteoroloxía ou outras dificultades imprevistas.
O concelleiro Xesús Domínguez destacou que o Pombal é unha rúa con problemas de accesibilidade, situada nunha zona con varios centros educativos, polo que a mellora da seguridade é prioritaria. A reurbanización favorecerá o calmado do tráfico, un obxectivo clave deste novo modelo urbano.
Na nova configuración da rúa haberá unha única beirarrúa ao carón dos edificios, cun ancho ampliado de 1,80 metros. A calzada terá un ancho de tres metros e incluirá un carril bici en sentido subida, situado ao carón do muro da Alameda. A rúa será unha plataforma única, con só uns centímetros de diferenza de altura entre a calzada e a beirarrúa, empregando materiais distintos para cada unha. Ademais, instalaranse pasos peonís elevados para reducir a velocidade do tráfico rodado.
As obras tamén implicarán a renovación das instalacións xerais de saneamento e abastecemento, actualmente de fibrocemento, así como das redes de telecomunicacións, gas natural e iluminación pública. Segundo explicou Xesús Domínguez, estas actuacións esixen que as obras se realicen na totalidade da rúa, sen posibilidade de manter carrís intermitentes abertos ao tráfico.
TRÁFICO E LIÑAS DE AUTOBUS
En relación ao tráfico e transporte urbano e o que suporán estas actuacións, Duro explicou que, a pesar de que as modificacións están sendo comunicadas e sinalizadas, é inevitable que se produzan problemas, especialmente nos primeiros días dos cortes, ata que condutores e condutoras se adapten aos novos itinerarios. «É un dos eixos principais da mobilidade en Santiago, e non hai alternativas fáciles», lembrou este, polo que se realizará «un importante esforzo por sinalizar desde as diferentes entradas da cidade, para evitar a chegada de vehículos a ese punto».
Duro mencionou medidas preliminares, como o pintado na rúa de Galeras para permitir xiros cara a García Sabell, facilitando outra saída para evitar atascos. Instalaranse semáforos en Poza de Bar para permitir o paso alterno cando Cruceiro do Gaio esté pechado. A fase inicial inutilizará Travesa do Cruceiro do Gaio para o tráfico e habilitará a beirarrúa dereita para peóns. Na segunda fase, a beirarrúa esquerda será peonil e a dereita para residentes. Na última fase, Cruceiro do Gaio abrirá e manterase a distribución de beirarrúas. Os cambios comunicáronse a navegadores e agradecéuse a colaboración co aparcamento «La Catedral».
Por outra banda, as obras afectarán sete liñas de autobús, con desvíos en sentido centro por Poza de Bar, Burgas e saída a Rosalía de Castro ou Xoán Carlos I. A liña 4 desdobrarase en rutas Cancelas-Mallou e Romaño-Praza de Galicia. Hai esforzos adicionais para informar veciños e usuarios, con folletos e vinilos en marquesinas, e Tussa está disponible para consultas.