O patrimonio artístico do compositor Enrique X. Macías, cedido á USC

A familia do compositor vigués Enrique Xerardo Macías Alonso (1958-1995) cédelle temporalmente o seu patrimonio artístico á Universidade de Santiago de Compostela mediante un contrato de comodato, reafirmando así o seu compromiso coa educación e a cultura. Grazas á mediación de Roberto Oliveira e o Grupo de Investigación Organistrum, foi posible trasladar os fondos documentais á USC, enriquecendo así o patrimonio cultural da institución e poñéndoo á disposición do estudantado e do persoal investigador.

No acto de entrega, que terá lugar mañá mércores no Salón Nobre do Colexio de Fonseca ás 12.30 horas, exhibiranse algúns dos elementos máis destacados da colección, e realizarase unha presentación na que participarán o irmán do compositor, Javier Macías Alonso; a coordinadora do Grupo Organistrum, Montserrat Capelán; a directora da Biblioteca Universitaria (BUSC), María Isabel Casal Reyes, e o investigador Roberto Oliveira-Ogando. Este evento de honra á memoria do compositor pecharase coa reprodución da obra acusmática ‘Lied für María’ (1982) mediante un dispositivo analóxico, utilizando unha das cintas magnetofónicas orixinais do compositor.

Nun contexto de arquivo patrimonial, un contrato de comodato é un acordo polo cal unha persoa física, institución ou entidade responsable do arquivo (o comodante) cede temporalmente documentos, obxectos ou materiais da súa colección a outra institución, persoa ou entidade (o comodatario) para a súa exhibición, estudo, conservación ou outros fins específicos. O obxectivo principal destes contratos é garantir a preservación e seguridade dos materiais prestados; isto axuda a protexer o patrimonio cultural e facilita a colaboración entre institucións para promover o acceso e a difusión do coñecemento histórico.

En canto aos documentos que compoñen esta colección, estos foron dixitalizados, incluíndo unha colección de 180 cintas magnetofónicas das que se recuperou un 92 % do seu contido. Este labor de preservación e dixitalización permite acceder á riqueza da obra de Macías dunha maneira máis accesible e duradeira.