Adxudicado o servizo de reparación e reforma de colexios e edificios municipais por 1,5 millóns de euros

O contrato para o servizo de conservación, reparación e pequenas reformas en diversos edificios e instalacións municipais de Santiago de Compostela para os vindeiros dous anos foi aprobado na xornada de hoxe pola Xunta de Goberno.

Na súa sesión ordinaria, esta aprobou a adxudicación do contrato para o servizo de conservación, reparación e pequenas reformas en diversos edificios e instalacións municipais da capital compostelá, según a cal o Concello de Santiago destinará 1.420.172,60 euros a este servizo, que será xestionado pola empresa Espina y Delfín.

Os fondos, pola súa banda, distribúense con 800.000 euros para centros de educación infantil e primaria, 228.000 euros para edificios de administración xeral, 200.000 euros para edificios deportivos e 192.172 euros para varios centros socioculturais.

Ademais, acordouse prorrogar o contrato de mantemento, conservación e mellora dos espazos verdes e do arboredo do concello por dous anos, desde o 1 de setembro de 2024 ata o 31 de agosto de 2026, cun reparto orzamentario por anualidades: 1.258.237,45 euros para 2024, 3.774.712,34 euros máis 121.000 euros en traballos complementarios para 2025, e 2.516.474,89 euros máis 121.000 euros en traballos complementarios para 2026.

No ámbito das obras, aprobouse a contratación do proxecto de ampliación da plataforma viaria entre Cañoteira e Outeiro de Marrozos (2ª fase), cofinanciado polo Plan provincial de cooperación da Deputación da Coruña, cun orzamento de 356.700 euros. Tamén se autorizou o inicio dos trámites para a recepción das obras de mellora de accesibilidade e seguridade peonil na rúa Camiño dos Vilares, e aprobouse a certificación final das obras de mellora da accesibilidade no concello.

En canto ás licenzas, aprobouse a concesión á Xunta de Galicia para a mellora da accesibilidade no CEIP Plurilingüe de Vite 1, cun orzamento de 84.712,20 euros, así como a suspensión cautelar da reforma da normativa de usos do Plan especial de protección no ámbito da cidade histórica (PE-1).