17 junio, 2024
O centro sociocultural de Santa Marta, en Compostela, acollerá este mércores 19 de xuño, de 11:00 a 13:30, a entrega de galardóns da terceira edición do Premio Galego de Educación para o Desenvolvemento e Cidadanía Global.
Esta iniciativa, impulsada pola Coordinadora Galega de ONGD co apoio da Dirección Xeral de Relacións Exteriores e coa Unión Europea da Xunta de Galicia, ten como obxectivo recoñecer experiencias educativas transformadoras que fomenten unha cidadanía solidaria, crítica e comprometida coa construción dun mundo xusto.
Nesta a súa terceira edición, os proxectos premiados serán «Sentindo en feminino» do CEIP López Ferreiro de Santiago de Compostela na Categoría A (Educación Infantil e Primaria), un proxecto dirixido a Educación Infantil que procura dotar á cativada das competencias necesarias para un desenvolvemento integral e equilibrado, centrado no emocional dende unha perspectiva feminista, buscando crear un espazo de igualdade e coidado, xunto con Re_Étika: pensa, consume, actúa. I Feira da sustentabilidade» do IES Luís Seoane de Pontevedra, e «Cartografía corporal: dos discursos de odio a un lecer compartido» da facultade de Ciencias da Educación da Universidade da Coruña, nas categorías B e C respetivamente.
O acto de entrega de premios estará amenizado pola narradora e creadora de contidos galega Leti da Taberna, e contará tamén coa presenza de Ana Arias, xefa do Servizo de Formación e Coordinación Institucional da Cooperación ao Desenvolvemento da Xunta de Galicia, e María Rozas, tenenta de alcaldesa do Concello de Santiago, así como representantes dos proxectos premiados, centros gañadores da anterior edición e diversas organizacións de cooperación ao desenvolvemento.
Os equipos docentes e o alumnado implicado en cada proxecto recibirán un diploma, e o centro unha distinción elaborada polos artesáns de Silvereira, mentres que, como novidade nesta edición, dúas persoas do equipo docente responsable de cada proxecto premiado viaxarán no verán a un proxecto de cooperación en Guatemala.
O acto rematará cun café ou chocolate e galletas de comercio xusto para todas as asistentes, facilitado pola ONGD Solidariedade Internacional.