17 junio, 2024
O CEIP A Igrexa-Calo acolleu hoxe a presentación do libro Os bolechas visitan Teo, editado co apoio do Concello teense, nun acto que contou coa presencia da alcaldesa de Teo, Lucía Calvo de la Uz e conselleiro de Educación, Ciencia, Universidades e Formación Profesional, Román Rodríguez, así como tamén das concelleiras de Educación, María Vázquez; de Cultura e Turismo, Margarita Rosende; e de Relacións Veciñais, Juan Cerqueiro.
Así, a rexedora municipal destacou que, grazas a este libro, a cativada poderá coñecer de forma lúdica e didáctica os lugares máis emblemáticos do municipio de Teo, a través do Camiño de Santiago Portugués que pasa pola localidade. «Confiamos en que vós, as nenas e os nenos de Teo, aprendades algo máis sobre o concello no que vivides e estudades, pero, sobre todo, vos sintades orgullosos e felices de formar parte deste lugar», sinalou a alcaldesa durante o acto.
Guiados polas estrelas, Os Bolechas percorren os lugares máis emblemáticos das trece parroquias do concello, como o igrexario de Vilariño e a Casa Reitoral de Bamonde. Tamén coñecen a Estatua da Nai, de Manuel Mallo, situada na parroquia de Oza, e pasan pola casa do antigo concello en Lucí. Achéganse á Burga de Xermeade, en Reis, e cruzan a ponte Mariola, no Xirimbao, e a medieval de Pontevea.
Durante a súa ruta, tamén se achegan á fonte da Florida, en Rarís; pasan polo campo da festa de Luou e o miradoiro do Pico da Grela, en Lampai. Por último, despois de atravesar o túnel do Faramello, en Calo, chegan ata o miradoiro de Montouto, en Cacheiras, e á piscina dos Tilos. Ao longo desta ruta, os personaxes tamén falan do patrimonio inmaterial do Concello de Teo, como o Entroido dos Xenerais da Ulla.
Neste acto de presentación, Os Bolechas estiveron acompañados por arredor de 450 escolares (de tres centros).
Por outra banda, este novo proxecto inclúe un caderno de actividades, onde a rapazada poderá reforzar os contidos aprendidos no libro. Trátase dun material adaptado á súa idade para dar a coñecer o concello de Teo dunha forma lúdica, pedagóxica e didáctica, co fin de que as nenas e os nenos aprendan máis sobre o lugar onde viven, estudan e se relacionan.