Arranca a festa do comercio local en Santiago

Música, pasarrúas, animación infantil e numerosos agasallos compoñen a programación de «Prima 24», a festa do comercio local que arranca este venres 14, e ata o sábado 15 de xuño, en distintos barrios da capital compostelá.

A propia rexedora de Santiago, Goretti Sanmartín, xunto coa concelleira de Promoción Económica, María Rozas, realizarán precisamente este venres un percorrido para coñecer de primeira man as propostas comerciais e lúdicas desta cita que xa é case tradición na cidade.

Así, esta cuarta edición da festa do comercio local traerá consigo un extenso programa de dinamización que abarcará diversas propostas e espazos da cidade.

PROGRAMA

Así, esta festa do comercio local celebrará a súa cuarta edición cun amplo programa de dinamización que chegará a diferentes espazos da cidade. Na tarde do venres 14 haberá diferentes pasarrúas: na zona vella coa banda Tanto nos ten; Pulpiño Viascón levará o seu show itinerante «A Trikidisco» por Conxo e Pontepedriña; e na zona de Concheiros e San Pedro presentarase «O estrano caso do dentista da rúa Blasov», de Troula Animación. Mentres, na Praza Roxa desenvolverase a chamada «Prima pequena», unha festa infantil con maxia e música, coas actuacións de Mamá Cabra, Joshua Kenneth e Pakolas.

Xa o sábado 15, «Prima 24» ofrecerá propostas para todos os gustos. A praza de Cervantes acollerá unha exhibición dos mestres artesáns de Ourives de Compostela, en horario de mañá e tarde, de 10:00 a 14:00 e de 16:00 a 20:00 horas. Na Praza Roxa, o Trío Detrés presentará o seu espectáculo «+Ritmo» a partir das 12:00 horas. A programación do sábado inclúe pasarrúas pola zona vella e polo Ensanche. O primeiro será pola mañá, coas acrobacias e malabares da compañía Tótem; e o segundo pola tarde, co repertorio de jazz dos Dixie Kings. Finalmente, a praza de Feixóo será o escenario de dous concertos: ás 13:00 horas coa Ukestra do Medio, e ás 20:00 horas con Anxo Araújo. No caso de chuvia, estes concertos trasladaranse á praza de Mazarelos.

Esta celebración, á súa vez, contará tamén coa tradicional ruleta de agasallos «Eu merco aquí», que estará instalada o venres pola tarde na Praza Roxa e o sábado pola mañá na Praza do Toural e na que poderán participar todas as persoas maiores de 16 anos que presenten un tícket de compra realizada no comercio de Santiago entre o 10 e o 15 de xuño, por un importe igual ou superior a 5 euros. Cada tícket dá dereito a unha tirada, e cada persoa non poderá recibir máis de tres premios, que serán agasallos comprados no comercio local.

IMPLICACIÓN DO COMERCIO LOCAL

«Os e as comerciantes sumárense á festa sacando os seus produtos ás beirarrúas, adornando as súas tendas para a ocasión, e difundindo a cartelería para informar á súa clientela da programación. O Concello, como en anos interiores, distribuiu bolsas coa imaxe da campaña #EuMercoAquí, que se entregarán de balde ao comercio local a través das asociacións de comerciantes da cidade», destacaron dende Raxoi a través dun comunicado.