Concerto de Ensemble Liberdade no CGAC

As Xornadas de Música Contemporánea regresan a Compostela cun calidoscopio de sons e propostas artísticas, nun evento que vense realizando entre o 5 e o 20 de xuño organizado polo Auditorio de Galicia – Compostela Cultura, o Concello de Santiago, o Centro Galego de Arte Contemporánea (CGAC) e a Universidade de Santiago de Compostela e o apoio económico da Deputación da Coruña.

Para esta ocasión, serán Ensemble Liberdade os encargados de facer vibrar o auditorio do CGAC. A banda incorpora pola primeira vez dúas novas variables que rachan coa sonoridade dunha formación musical de cámara. A guitarra eléctrica de Manuel Cebrián e a voz poliédrica de Rubén Fernández súmanse agora ao violín de Elena Vázquez, á viola de María José Pámpano, ao violonchelo de Macarena Montesinos, á batería de LAR Legido, aos saxos e a gaita de Diego Alonso e Xosé Miguélez e mais á trompeta de Javier Pereiro para artellar un espectáculo que nos fai claudicar ante a exuberancia sonora e dá conta das posibilidades infinitas da música.

Ensemble Liberdade é a formación de guerrilla da Orquestra Galega de Liberación, liderada por Xacobe Martínez Antelo. Trátase dun proxecto musical que ten na improvisación a súa fonte primixenia de inspiración e cuxo principal cometido é investigar co fin de ir superando fronteiras musicais e amosar os novos camiños e puntos de fuga que se abren ante nós.