12 junio, 2024
O evento «Sabor a Novo», que busca destacar a produción e artesanía galega, xunto co comercio local, congregará a máis de cincuenta marcas galegas de moda, xoiería, cerámica, cestería, decoración e incluso alimentación, que se darán cita o vindeiro domingo no Pazo de San Lourenzo nunha actividade que tamén ofrecerá música en directo, talleres de creación artesanal e unha ampla oferta gastronómica na procura ser tamén unha experiencia lúdica para atraer a novos públicos.
A concelleira de Dereitos e Servizos Sociais, Promoción Económica e Xuventude, María Rozas, presentou esta mañá o evento «Sabor a Novo» nunha rolda de prensa acompañada pola organizadora e directora de Correveydile, Mónica Mejías; a xerente da Fundación Pública Artesanía de Galicia, Elena Fabeiro; e a xerente do Pazo de San Lourenzo, Charo Barca. Rozas destacou que «o Concello comparte os obxectivos desta actividade, que procura dinamizar as compras nun momento difícil para o comercio local, que enfronta moitas dificultades ante a competencia das vendas en liña». A concelleira sinalou que «Sabor a Novo» terá lugar o domingo, «pechando unha fin de semana de celebracións no comercio local, xa que o venres e o sábado teremos o evento Prima 24, tamén destinado a poñer en valor o noso comercio».
En «Sabor a Novo» participarán máis de cincuenta marcas galegas, que exhibirán e venderán as súas coleccións de moda, xoiería, bisutería, cerámica, cestería, artigos de coiro, decoración e produtos alimentarios. Deste xeito, os visitantes poderán descubrir as novas coleccións dos talleres con selo de Artesanía de Galicia, así como de novos produtores, creadores e artistas galegos. Ademais, nos xardíns do Pazo de San Lourenzo haberá moitas actividades complementarias: concertos, como o de Zeltia IreVire; sesións de música con Peter Sélek; talleres de creación artesanal coas técnicas de cianotipia e gyotaku; e tamén unha interesante oferta gastronómica. A entrada ao evento, que comezará ás 12 horas, é de balde, e haberá un servizo de gardería-ludoteca para os máis pequenos.
Esta cita, por outra banda, será tamén unha oportunidade única para coñecer o Pazo de San Lourenzo, un espazo privado pero incluído no Patrimonio Artístico Nacional. As actividades da feira desenvolveranse tanto nos xardíns como no claustro e nos diferentes salóns do edificio, «onde se cre que Rosalía de Castro buscaba inspiración para Follas Novas, onde pasaba as súas vacacións o emperador Carlos I de España e V de Alemaña, e onde, segundo a lenda, estivo encerrado Santiago Pedro Muñiz acusado de nigromante».