Santiago celebra o Día Europeo da Música cun rico programa do 18 ao 22 de xuño

A celebración do Día Europeo da Música, que terá lugar o 21 de xuño, «prolongarase» durante toda unha semana na capital galega, xa que Compostela Cultura promoverá toda unha serie de propostas para «destacar a diversidade e a riqueza da cultura europea» e que chegará ao Teatro Principal entre o 18 e o 22 de xuño. Será un total de catro concertos e un espectáculo de danza con música en directo que reunirá a artistas e formacións musicais de Galicia, do resto do estado e de Europa.

PROGRAMA

O ciclo comeza o martes 18 de xuño ás 20:30 horas con Somos, unha creación da compañía de danza lookathingsdifferent con música en directo do compositor e pianista compostelán Nico Casal. Este espectáculo, que se integra nas Xornadas de Música Contemporánea e no circuíto Danza a Escena do Instituto das Artes Escénicas e da Música (INAEM), convida a apreciar a beleza da arte a través do movemento, coa coreografía de Carla Cervantes Caro e Sandra Egido Ibáñez. As entradas, a 10 € (co 50% de desconto para os colectivos habituais), están dispoñibles na web de Compostela Cultura e no despacho de billetes da Zona C · Punto de Información Cultural, así como no Teatro Principal o propio día do espectáculo dende unha hora antes do seu comezo.

O mércores 19 de xuño, a artista italiana Maria Mazzotta tomará o escenario do Teatro Principal ás 20:00 horas para presentar Amoreamaro, o seu álbum debut que a levou a percorrer Europa con máis de 80 concertos en máis dunha vintena de países. Esta é a súa primeira actuación en Galicia, onde Mazzotta transportará ao público nunha viaxe emocional a través do canto e da tradición popular salentina do sur de Italia. As entradas, a 12 €, pódense adquirir nas mesmas canles e cos descontos habituais de Compostela Cultura.

O xoves 20 de xuño ás 20:00 horas, a Banda Municipal de Música de Santiago de Compostela ofrecerá o concerto Dende a semente creativa, parte das Xornadas de Música Contemporánea de 2024. Dirixida por David Fiuza, a banda estreará obras de Xosé Carlos Seráns Olveira, Federico Mosquera e Fernando Ruibal, e interpretará unha obra de Juan Fernández Guzmán. A actuación contará coa participación dos solistas galegos Antonio Romero Cienfuegos (contrabaixo) e Rafael Yebra (saxofón). O recital é gratuíto previa retirada de convites (máximo 2 por persoa) na web de Compostela Cultura, na Zona C e no despacho de billetes do Teatro Principal.

Xa o venres 21 de xuño, Día Europeo da Música, ás 20:00 horas, Pablo Sanmamed presentará en concerto Zugunruhe. Inquietude Migratória, o seu terceiro álbum de estudio. Xunto ao óboe de Benxamín Otero, o trío de jazz formado por Sanmamed (contrabaixo), Iago Mourinho (piano) e Bruno Couceiro (batería) explorará musicalmente o comportamento ansioso das especies migratorias, especialmente das aves. As entradas, a 12 €, pódense adquirir con descontos a través das canles habituais.

O ciclo concluirá o sábado 22 de xuño ás 20:00 horas cun concerto que reunirá dúas propostas artísticas de ambos lados do Miño. Primeiro actuará Mel, proxecto de Lucas de Centi e Sandra Pérez que mestura estilos de música electrónica con elementos tradicionais e de jazz, contando coa participación de Antía Muíño (voz) e Miguel Arribas (saxos e efectos sonoros). A continuación, Susana Nunes presentará sús, o seu proxecto en solitario que combina electrónica experimental e art pop, co son e a exploración vocal como eixes principais. As entradas, tamén a 12 €, están dispoñibles na web de Compostela Cultura e na Zona C · Punto de Información Cultural.

ENTRADAS

As entradas e convites para todos estes eventos están dispoñibles na web de Compostela Cultura e no despacho de billetes da Zona C · Punto de Información Cultural (aberto de martes a sábado, de 11:00 a 14:00 e de 16:00 a 19:00) e tamén se poderán retirar no Teatro Principal o día de cada espectáculo dende unha hora antes do seu inicio.

Todos os eventos contan cun 50% de desconto para persoas desempregadas, perceptoras de rendas sociais, xubiladas, maiores de 65 anos, estudantes, menores de 25 anos e membros de familias monoparentais ou numerosas.