A USC e da Universidade Pública de Cabo Verde reforzan a súa colaboración

Mellorar o benestar social e a convivencia da comunidade local de Cabo Verde a través de proxectos educativos con metodoloxía Aprendizaxe-Servizo (ApS) é o obxectivo do grupo de investigación Esculca da USC, que leva meses traballando estreitamente coa universidade pública do país africano.

A súa intención é transferir o coñecemento do equipo da USC, xunto coa entidade Farmamundi, para capacitar á comunidade universitaria de Cabo Verde. O obxectivo é artellar procesos de renovación e transformación social que satisfagan as necesidades locais con solucións contextualizadas e innovadoras. En esencia, trátase de desenvolver accións para institucionalizar a aprendizaxe-servizo no país, tomando como referencia o proceso seguido pola USC anos atrás.

Pola súa parte, proxecto ten como finalidade promover a ApS na África Subsahariana, incluíndo esta metodoloxía nos plans formativos da Universidade Pública de Cabo Verde, para que actúe como núcleo dinamizador da transformación social e do fortalecemento da convivencia.

No marco do proxecto ‘Aprendizaxe-Servizo e Cooperación para o Desenvolvemento. Formando para a Cidadanía Global’, o coordinador do Grupo Esculca, Miguel A. Santos, e o investigador principal do proxecto, Alexandre Sotelino Losada, visitaron recentemente Cabo Verde. Alí, constataron os avances na consolidación da metodoloxía ApS na Universidade de Cabo Verde (UNICV) e mantiveron reunións co equipo reitoral da universidade e co secretario de Estado para o Ensino Superior do Ministerio de Educación do Goberno de Cabo Verde.

Ademais, organizaron un seminario onde se expuxeron os diferentes proxectos en desenvolvemento na UNICV, coa participación de docentes, estudantes e entidades sociais. Nos próximos meses, seguirase avanzando neste proceso coa publicación dunha guía de boas prácticas e outras dinámicas previstas.

O Grupo de Investigación ESCULCA, con sede na Facultade de Ciencias da Educación, traballa na mellora das relacións entre a Universidade e a sociedade civil, centrado na equidade, calidade educativa e transformación social mediante redes de cooperación e transferencia do coñecemento. O grupo é recoñecido nacionalmente, con premios como o Primeiro Premio Nacional de Investigación Educativa (2007) e o Terceiro Premio de Investigación Educativa (2003), e a nivel autonómico, co María Barbeito de Educación en Galicia á Investigación Pedagóxica (2010) e o Premio ao Labor na Investigación Humanística (2019).

Por outra banda, aprendizaxe-Servizo (ApS) é unha metodoloxía pedagóxica aplicada nos últimos anos, especialmente na Educación Superior, que busca conectar o currículo co entorno a través da participación directa do estudantado. Esta práctica proporciona servizos profesionalizados a comunidades, cubrindo necesidades sociais, mentres que o alumnado aprende de forma máis contextualizada e responsable.