Os colectivos Ulla Viva e Baixo Ulla Vivo conmemoran un Día do Medio Ambiente marcado polo rexeitamento a Altri

Os colectivos A Ulla Viva e Baixo Ulla Vivo organizaron onte, 5 de xuño, un acto reivindicativo na ponte medieval de Pontevea, co gallo do Día Mundial do Medio Ambiente, para amosar o seu rexeitamento á instalación da anunciada megafactoría de produción de celulosa que Altri e Greenalia promoven en Palas de Rei.

Estes colectivos naceron recentemente nos concellos de Teo, Vedra, Boqueixón e A Estrada no caso de A Ulla Viva, e de Pontecesures, Catoira, Valga, Rianxo, Padrón, Rois e Dodro no caso de Baixo Ulla Vivo. A creación destes grupos responde ao rexeitamento social ao proxecto «Gama Greenfiber», que se pretende instalar en Palas de Rei, xa que a súa influencia afectaría ao río Ulla ao longo de todo o seu percorrido.

Durante o acto de onte ambos colectivos  despregaron pancartas na ponte medieval de Pontevea con lemas de rexeitamento á fábrica e exixindo un Ulla limpo e vivo. Ademais, levouse a cabo unha actuación musical coa interpretación da “Cantiga das Encrobas”, un histórico cántico sobre a loita da xente labrega das Encrobas contra a explotación mineira que destruía as súas terras, establecendo un paralelismo coa situación actual na Ulloa. A actuación musical estivo a cargo de Xosé Allegue, Xosé Constenla, Xosé Luis Rivas “Mini”, Andrea Piñeiro e Suso Alonso.

Para finalizar, deuse lectura a un manifesto polo Día Mundial do Medio Ambiente, no que se denunciaba que o proxecto Greenfiber se presenta como unha «industria de enclave», aproveitando os recursos dun territorio para obter beneficios para si mesma, sen beneficio para a comunidade local. Tamén se cuestionaron as cifras de postos de traballo que Altri-Greenalia asegura que se crearán, contrastándoas cos que se poderían destruir.

No manifesto, tamén se denunciou a situación actual do río Ulla, que precisa de actuacións para mellorar a calidade da súa auga e posibilitar a vida de especies en perigo de extinción, como o mexillón de río ou o furapresas. Alertouse de que a fábrica non só non mellorará esta situación, senón que devolverá ao río 30.000 metros cúbicos de auga contaminada dos 46.000 que extraerá cada día, agravando os problemas de calidade da auga potable na zona e xerando preocupación pola dispoñibilidade de auga en tempos de seca e polas novas necesidades de depuración.

Por todas estas razóns, convidouse á veciñanza destes concellos a unirse aos colectivos Baixo Ulla Vivo e A Ulla Viva para continuar levando a cabo accións que trasladen a Altri, Greenalia, á Xunta de Galicia e ao goberno do Estado o rexeitamento social á instalación desta macrofactoría.