O Concello de Padrón uniuse á celebración do Día do Medio Ambiente

Padrón celebrou este mércores, 5 de xuño, o Día Mundial do Medio Ambiente cunha serie de obradoiros educativos dirixidos ao alumnado do municipio e que forman parte dun proxecto de promoción da reciclaxe financiado polo Concello, Xunta de Galicia, Ministerio de Transición Ecolóxica e Fondos Next Generation da Unión Europea.

As concelleiras de Medio Ambiente, Ana Castro, e de Educación, Mariló Saco, presentaron aos estudantes diversas actividades que destacaron os beneficios da reciclaxe e a correcta separación de residuos, animando aos asistentes a poñelas en práctica.

O alumnado do CEIP Rosalía de Castro e IES Camilo José Cela participou en sesións reducidas de 20 alumnos e alumnas, permitindo unha maior participación nos xogos e actividades. Nas próximas semanas, a campaña chegará aos demais centros educativos de Padrón.

Así os nenos e nenas de educación infantil e primaria divertíronse con actividades como un quebracabezas xigante, unha ruleta de residuos para identificar os contedores correctos e un set de cubos para as diferentes fraccións de lixo. Por outra banda, os estudantes de secundaria e bacharelato participaron en guías didácticas sobre a regra das ‘tres R’ e utilizaron aireadores e termómetros para medir a temperatura do compost nas distintas fases.

Ana Castro destacou a importancia de ensinar a reciclaxe dende a infancia: «É fundamental que desde pequenos aprendan a importancia da reciclaxe e a separación de residuos porque eles serán en moitos casos os que lles van dicir aos seus pais como facelo». A concelleira subliñou as numerosas campañas realizadas en Padrón para coidar a contorna, como a recollida de lixo na beira do río, e expresou a intención de continuar con máis propostas para a veciñanza de todas as idades. No Día Mundial do Medio Ambiente, insistiu en que «é fundamental non só coidar a natureza, senón tamén gozar dela».

«Estas actividades reflicten o compromiso do goberno local de Padrón coa sustentabilidade e a protección do medio ambiente. Con estas accións, espérase que tanto os máis pequenos como os adultos adquiran os coñecementos necesarios para converterse en cidadáns responsables e comprometidos coa preservación da nosa contorna», destacou o propio Concello.