A ciencia de datos e as súas aplicacións á sociedade e o eido empresarial, a debate este xoves

Por primeira vez na súa historia, Santiago acollerá esta semana a conferencia «Data Science in Fundamental Physics and the Bridge to Industry & Society», un evento que busca fomentar o diálogo entre o ámbito académico e a industria, así como visibilizar oportunidades profesionais para as persoas interesadas na ciencia de datos e as súas aplicacións na sociedade e no eido empresarial.

Despois de tres edicións celebradas en Portugal, nas cidades de Lisboa, Braga e Coimbra, será o Instituto Galego de Física de Altas Enerxías (IGFAE), centro mixto da Universidade de Santiago de Compostela e a Xunta de Galicia, quen exerza de anfitrión desta cita.

Así, tras o curso intensivo sobre Probabilidade, Estatística e Machine Learning, destinado a estudantes de doutoramento e persoal investigador posdoutoral. O simposio propiamente dito dará comezo no Centro de Estudos Avanzados este xoves 6 ás 9.00 horas, cun acto inaugural seguido dunha intervención do director do IGFAE, Carlos Salgado.

Durante as dúas xornadas do evento, máis de 20 representantes de empresas e centros de investigación falarán sobre as últimas tendencias no sector, as demandas e as aplicacións prácticas da ciencia de datos no día a día. O obxectivo é profundar nas relacións entre a física fundamental e a industria, utilizando a ciencia de datos como elo de unión.

«Miles de empresas de todo o planeta andan actualmente á procura de persoal especializado en ciencia de datos, sendo un dos perfís máis demandados. Desde os xigantes das aplicacións sociais ata as empresas de venta minorista, pasando por compañías farmacéuticas, de consultaría ou telecomunicacións. Esta disciplina ten por obxectivo analizar enormes conxuntos de datos que se producen de forma continua, para encontrar correlacións, relacións causais e patróns cos que construír hipóteses, asignar significados ou avaliar a eficiencia de algoritmos», destacou a USC.

Neste contexto, o simposio organizado polo IGFAE ten como obxectivo mellorar a formación en ciencia de datos do persoal investigador en fases iniciais da súa carreira e ofrecerlles a oportunidade de establecer contacto directo co mercado laboral e coas necesidades da sociedade nesta área. Ademais, o IGFAE aproveitará para achegar ás persoas e organizacións participantes as súas capacidades científicas nas áreas de Física de Altas Enerxías, Física Nuclear, Astropartículas e Física Fundamental.