4 junio, 2024
O Concello de Brión organiza o obradoiro “Deconstruíndo consciencias” do proxecto Galicia Latente, unha iniciativa de dinamización da cultura galega emerxente desenvolto polo fotógrafo Eduardo de Martís e que terá lugar na Casa da Cultura de Brión o sábado 8 de xuño, a partir das 10:30 horas,, sendo a súa participación libre e de balde e sen precisar de inscrición algunha.
«Galicia Latente é un proxecto para achegar ás persoas o valor social, económico e sustentable que atesoura a cultura galega no presente e plantea os retos e oportunidades do futuro. Unha iniciativa que ten como base un estudo-libro homónimo de recollida e divulgación fotográfica da cultura galega e as súas múltiples realidades que estamos a vivir en Galicia. Un libro autoeditado polo fotógrafo Eduardo de Martís e que recompila 233 fotografías feitas entre os anos 2020 e 2023, ao longo de máis de 140 concellos galegos», destaca o propio Concello.
Así, este obradoiro “Deconstruíndo conciencias” comezará cunha presentación sobre a importancia e dimensión da cultura, ao que seguirá unha proxección do documental “Galicia Latente” e un coloquio titulado “Retos e oportunidades da cultura galega”.