Campionatos de España de loitas olímpicas e de praia en Santiago

Redacción

Santiago acolle este sábado 8 e domingo 9 de xuño tres campionatos absolutos de España de loita nas modalidades olímpicas: loita libre feminina, loita libre masculina e loita grecorromana. Ademais, celebraranse os campionatos de España de Praia nas categorías absoluta e U17 de loita e sambo. Os torneos desenvolveranse no pavillón municipal de Santa Isabel e foron presentados esta mañá en rolda de prensa pola concelleira de Deportes, Pilar Lueiro, acompañada por Pablo Pintos Figueiroa, director técnico da Federación, e Belisa González, responsable de Administración.

Nesta liña, Pilar Lueiro destacou «o aumento no número de deportistas femininas, sendo Galicia un dos referentes a nivel nacional». Engadiu que «iniciativas como estas sitúan ao noso concello como un referente deportivo que, ademais da visibilización do deporte, tamén ten un gran retorno económico para Santiago».

Pola súa banda, estes campionatos, que contarán coa participación de 612 deportistas, están organizados pola Federación Galega de Loita en colaboración coa Federación Española de Luchas Olímpicas, o Club de Loita Stellae, o Concello de Santiago de Compostela, e a Secretaría Xeral para o Deporte.

COMPETICIÓN

Así, o campionato disputarase en 4 tapices oficiais de loita e contará cos mellores deportistas nacionais, representando a cada unha das comunidades autónomas. Os resultados finais determinaranse a nivel individual, por clubs e por seleccións.

A competición desenvolverase en tres xornadas:

Sábado 8, xornada de mañá: Cto. de España ABSOLUTO, eliminatorias.
Sábado 8, xornada de tarde: Cto. de España ABSOLUTO, semifinais e finais.
Domingo 9, xornada de mañá: Sambo praia e Loita praia.

O público poderá acceder ao pavillón de balde para asistir á competición, que tamén poderá seguirse en liña en tempo real a través da plataforma SCORIZER da Federación Española.

«Tras o éxito organizativo dos últimos campionatos de España celebrados en Santiago nos anos 2021 e 2022, así como o éxito histórico do Campionato de Europa U20 de Loitas Olímpicas do ano 2023, a confianza depositada pola Federación Española no Concello de Santiago, confirma o traballo que se vén levando a cabo en Galicia dende hai varios anos», destacou o Concello.