3 junio, 2024
A iniciativa do Goberno da Baña para impulsar e dinamizar a súa feira mensual contou coa presenza duns trinta postos no mercadiño ambulante e coa participación de numerosos veciños e veciñas que se achegaron a San Vicenzo para mercar e degustar polbo.
Desde primeiras horas da mañá, a xente foi acudindo ao lugar para pasear polo mercadiño e explorar as ofertas dos trinta postos instalados neste primeiro luns de xuño. Entre os produtos ofertados estaban roupa, bixutería, plantas, calzado, pan e churros, entre outros. A partir do mediodía, incrementouse a afluencia tanto ao mercado como á polbeira, que comezou a servir as primeiras racións de polbo pouco despois das doce.
Unha das novidades desta iniciativa do goberno local para dinamizar a feira é precisamente a presenza da polbeira. De igual forma, para fomentar as compras, o Concello ofrece un vale desconto de dous euros para comer polbo a todas as persoas que realicen compras por importe superior aos 15 euros, tanto nos postos do mercadiño como no comercio e hostalería da Baña. Esta promoción estará vixente tamén na feira do mes de xullo, que se celebrará o día 1, e cada persoa pode trocar un máximo de dous vales por día.