3 junio, 2024
O Concello de Santiago quixo realizar hoxe un chamamento á veciñanza para facerse doante de órganos, destacando que «é un xesto solidario que non custa nada e pode salvar moitas vidas». A concelleira de Dereitos e Servizos Sociais, Promoción Económica e Xuventude, María Rozas, e o coordinador de Alcer Coruña, Alfredo Saborido, compareceron nunha rolda de prensa para anunciar as iniciativas que se desenvolverán con motivo do Día do Doante, que se celebra o próximo mércores.
Rozas explicou que «desde o Concello queremos apoiar e difundir a mensaxe que Alcer lanza con motivo do Día do Doante, unha celebración que a asociación leva facendo o primeiro mércores de cada mes de xuño desde hai 40 anos». A concelleira destacou que a súa concellaría mantén un convenio con Alcer para colaborar no programa de promoción da doazón de órganos e levar a información a ámbitos non estritamente sanitarios, senón que forman parte da vida cotiá. Este ano, Alcer contará coa colaboración dos concelleiros e concelleiras do Goberno nun video que se difundirá nas redes sociais, co lema: «Doar é doado».
Ademais, o Concello difundirá a mensaxe de Alcer nunha campaña específica de mailing e colaborará coa mesa informativa que estará situada na praza do Toural o 5 de xuño, de 17:00 a 20:00 horas.
Pola súa banda, Alfredo Saborido recoñeceu que aínda existen falsos mitos sobre a doazón de órganos, malia que España lidera os rankings mundiais de transplantes. Saborido explicou que «doar é o acto máis altruísta e solidario que se pode realizar» e subliñou a importancia da autonomía persoal para decidir sobre o propio corpo: «temos a opción de escoller en vida e facernos doantes, do mesmo xeito que facemos testamento para decidir sobre as nosas propiedades; porque se non escollemos antes, serán as nosas familias as que teñan que decidir en momentos moi delicados».
Segundo os datos proporcionados por Alfredo Saborido, en 2023 houbo 2346 doantes falecidos en todo o Estado, un 7% máis que o ano anterior, e 435 doantes vivos, cun incremento do 24%. Este destacou que a maioría das negativas familiares para a doazón de órganos «están máis relacionadas co momento no que a lei lles fai decidir que coa falta de información sobre o que supón ese xesto».