Real Madrid, Rayo Vallecano e Deportivo encabezan o cartel da RC Soccer Cup sub12 feminina de Vilaxoán

C.V.

Poucas semanas despois da celebración da terceira edición da RC Soccer Cup, o club San Martín de Vilaxoán dá un salto máis na promoción do fútbol de base organizando unha edición feminina na categoría sub12. E faino ao grande, contando con 13 equipos e un cartel que encabezan clubs como o Real Madrid, o Rayo Vallecano e o Deportivo de A Coruña, e no que non faltará unha ampla representación galega por parte de equipos como o Xuventude de Cambados, o Caldas, o Sonnoia ou o Narón O Freixo.

O torneo celébrase a fin de semana do 31 de maio, 1 e 2 de xuño no campo municipal de Vilaxoán, cun sistema de competición por grupos. Os partidos comezarán o venres pola tarde, a partir das 17.45 horas, e continuarán o sábado cunha intensa xornada que se desenvolverá entre as 9 e as 20.15 horas, “a tempo para presenciar a final da Champion”, segundo comentaron os organizadores na presentación do evento que tivo lugar esta mañá no Concello. O domingo destinarase á celebración dos encontros de cuartos, semifinais (a partir das 12.40) e final (ás 13.30). A entrega de trofeos e a clausura desta primeira edición da Ramiro Carregal Soccer Cup está prevista para as 14.15 horas.

Na presentación desta mañá participaron o alcalde, Alberto Varela, o concelleiro de Deportes, Carlos Coira, o director do torneo, Jorge Soto, a presidenta do club San Martín, Laura Navia, o deputado provincial, Marcos Guisasola, e o representante da Federación Galega de Fútbol, Juan Otero.