Brión aproba os seus orzamentos para este 2024

O Pleno Municipal de Brión aprobou esta mañá os Orzamentos Municipais para 2024, cun total de 7.771.316,63 euros, un 6,88% máis que en 2023. A voceira municipal, Sandy Cebral, destacou que o presuposto é “equilibrado, realista e social”, incrementando as partidas para servizos á veciñanza e duplicando a partida de investimentos reais. Ademais, salientou que é a primeira vez que se abre o debate a todas as forzas políticas, aínda que a unanimidade non foi acadada, xa que PSOE e PP votaron a favor, mentres que o BNG votou en contra.

Cebral agradeceu o traballo dos concelleiros e do persoal municipal na elaboración das contas, destacando que non hai incremento de impostos nin débeda, e que se aumentaron as consignacións en áreas como seguridade, mobilidade cidadá, gasto social, cultura, educación e deportes.

Máis de 1,2 millóns de euros destinaranse a investimentos reais, incluíndo a achega da Axencia Galega de Infraestruturas para a obra de acondicionamento da AC-543 e a pavimentación do acceso a Gosende, entre outros proxectos financiados integramente con recursos propios ou por outras entidades.

Os orzamentos tamén inclúen 15.000 euros para a ampliación da rede de abastecemento e saneamento en Brans de Abaixo, 22.500 euros para obradoiros de emprego e máis de 11.000 euros para melloras no CEIP de Pedrouzos. Cebral subliñou que os orzamentos son flexibles e abertos a propostas dos grupos da oposición que beneficien á veciñanza.

Durante as negociacións, o Grupo de Goberno acordou melloras nos camiños de acceso a explotacións gandeiras a petición do PP, e axudas para material escolar e renovación de parques infantís propostas polo BNG. O debate plenario reflectiu o agradecemento dos grupos da oposición pola inclusión de propostas, pero tamén críticas do BNG pola semellanza dos orzamentos cos do ano pasado e pola falta de transparencia.

A intervención da voceira do PP, María Fariña, xerou un careo co BNG, que acusou ao PP de vender os seus votos a cambio de melloras nos camiños. O vice-voceiro do PP, Waldo Carballo, defendeu a súa postura, asegurando que traballan polos veciños. Finalmente, o alcalde, Pablo Lago, fixo un chamamento á calma e ao traballo conxunto para o crecemento de Brión.

Na sesión tamén se aprobou por unanimidade a creación dun posto de Axente de Igualdade de Xénero e outro de Oficial Administrativo, e a petición dunha subvención de 350.000 euros á Deputación da Coruña para as obras de remodelación do campo de fútbol José Pumar, en Bastavales. As obras, cun investimento total de 536.917,39 euros, inclúen a ampliación do campo, novo alumeado, recollida de augas pluviais, rede de rego e peche en aluminio.