O nipón Takekazu Asaka será recoñecido como membro de honra da RAG

O nipón Takekazu Asaka, embaixador da cultura galega na propia Xapón, será recibido como académico de honra da Real Academia Galega (RAG) o vindeiro día 8 de xuño ás 12:00 horas, nunha cerimonia que terá lugar no Auditorio da Xuventude en Cambados.

Membro correspondente da RAG desde 2017, leva máis de tres décadas estudando o galego e a súa literatura, e promovéndoo en Xapón. Na súa intervención «Do poñente ó nacente. Unha ollada desde Xapón á lingua e á cultura galegas», o nipón abordará esta proxección exterior. Doutor en Filoloxía Románica pola Universidade de Kansa Gaidai (Osaka), foi profesor de castelán na Universidade Tsudajuku de Tokyo e impartiu clases de galego en varias universidades xaponesas e no Instituto Cervantes de Tokyo.

As primeiras achegas de Asaka para a aprendizaxe do galego desde o xaponés inclúen a «Gramática do galego moderno» (1993), actualizada na «Nova gramática galega» (2016), a «Guía de conversación en galego» (1994) e o «Vocabulario básico da lingua galega» (1996). Como lingüista, estudou tamén a situación do galego en Galicia e no Eo-Navia. No campo da tradución, verteu ao xaponés obras como os «Seis poemas galegos» de Lorca, «Cantares gallegos» e «Follas novas» de Rosalía de Castro, e «Os eidos» de Uxío Novoneyra. Ademais, publicou traballos sobre a lírica galega medieval e moderna, como «Xograr Martín Codax» (2015) e «Cantigas de Santa María» (2023).