Aprobadas as bases das axudas ao fomento do deporte federado

Redacción

A Xunta de Goberno Local aprobou as bases da «Convocatoria de subvencións en réxime de concorrencia competitiva, destinadas ao fomento do deporte federado para o ano 2024». O obxectivo desta convocatoria é promover as entidades deportivas locais de carácter federado, financiando parcialmente os gastos derivados da súa participación nas competicións oficiais das federacións autonómicas e nacionais. As axudas

Poderán optar a estas subvencións, que contan cun orzamento total de 330.000 euros e cun importe máximo de 18.000 euros por entidade, aquelas que participen en competicións oficiais federadas, que teñan a súa sede social no Municipio de Santiago e estean inscritas no Rexistro Municipal de Asociacións e no Rexistro da Secretaría Xeral para o Deporte da Xunta de Galicia. Non serán, por outra banda, beneficiarias destas subvencións as categorías das entidades que teñan un convenio nominal co Concello de Santiago de Compostela, os equipos de fútbol sala que compitan a nivel local, interzonal ou provincial debido ao alto número de participantes, e os equipos de fútbol de veteranos.

«O formulario oficial de solicitude CS006F estará dispoñible na sede electrónica do Concello de Santiago, no trámite «Solicitude de subvención»; unha vez se publique a convocatoria no BOP da Coruña. A partir de aí, as entidades interesadas disporán dun prazo de 15 días naturais para a presentación de solicitudes», destacou o Concello nun comunicado.

Así, serán subvencionables os gastos realizados entre o 1 de xaneiro e o 15 de outubro de 2024, incluíndo: pagamento de licenzas federativas e mutualidades, desprazamentos fóra do termo municipal para competicións oficiais federativas, aloxamento e manutención dos equipos ou deportistas (coincidindo co calendario oficial federativo), arbitraxes, material deportivo non inventariable (ata un máximo de 3.000 euros), alugueiro de instalacións para adestramentos ou competicións, así como gastos médicos e seguros de responsabilidade civil ou accidentes