O xestor xeral da Oficina Central de EUniWell, Graham Harrison, visita a USC

O reitor da Universidade de Santiago, Antonio López, recibiu este luns no seu despacho a Graham Harrison, xestor xeral da Oficina Central de EUniWell (European University for Well-Being) en Colonia (Alemaña).

Harrison está en Compostela estes días para reunirse co equipo local da propia USC e coñecer así de primeira man as súas impresións sobre os proxectos en marcha e futuros dentro do consorcio europeo de universidades do que a Universidade forma parte. Para Harrison, este consorcio “debe entenderse como unha plataforma que, a través da asociación de distintas universidades, busca construír unha universidade europea”.

Durante a súa visita, este tamén se reuniu cos coordinadores do Paquete de Traballo 8 (WP8), adicado á investigación, innovación e emprendemento, que a USC lidera ata o 2028 no marco do proxecto EUniWell-Weff.

Por outra banda, a vicerreitora de Titulacións e Internacionalización, María José López Couso, destacou que formar parte da Universidade Europea para o Benestar permite que “unha universidade completa como é a USC poida estar integrada arredor deste concepto transversal que representa o benestar e co que nos identificamos”, mentres que José María Miranda Boto, coordinador institucional do consorcio na USC, explicou que EUniWell é “o camiño para que cando chegue o plan europeo de titulacións a USC poida estar nesa competición” e, deste xeito, “crear unha universidade de futuro”.