23 mayo, 2024
A Conferencia de Decanos e Decanas de Psicoloxía das universidades españolas (CDPUE) viviu a súa reunión bianual no Centro de Estudos Avanzados da Universidade de Santiago. O acto de inauguración foi presidido polo vicerreitor de Profesorado da USC, Ernesto González Seoane, e contou coa presenza da decana do Colexio Oficial de Psicoloxía de Galicia e vogal do Consello Xeral da Psicoloxía, Rosa Álvarez Prada, así como do presidente da Conferencia, Antonio Ferrer Manchón. Este encontro busca crear un foro de discusión sobre cuestións que afectan aos ensinos oficiais da Psicoloxía en España, ademais de abordar aspectos específicos relacionados cos diferentes ámbitos desta ciencia e a súa aplicación profesional.
«A reunión da CDPUE supón un avance importante na consolidación da calidade e renovación dos estudos de Psicoloxía en España, segundo a organización. Nas xornadas do xoves e do venres, as persoas asistentes debaterán e buscarán o acordo en asuntos importantes para os estudos de Psicoloxía, explorarán vías de mellora das titulacións e traballarán sobre aspectos específicos de aplicación da Psicoloxía nos seus diferentes ámbitos profesionais e académicos», sinalou a organización a través dun comunicado.
Nesta primeira xornada desenvolveuse unha mesa de debate coordinada por Maribel Hombrados Mendieta da Universidad de Málaga, titulada ‘Psicoloxía da intervención social e comunitaria: formación e profesión’. Ademais, Miguel Ángel Rando, presidente da Asociación Española de Servicios Psicológicos y Psicopedagógicos Universitarios, impartiu unha charla titulada ‘Servicios de asistencia psicolóxica e/ou clínicas de psicoloxía nas universidades españolas: percorrido e estado actual’. Pola tarde, de 16.00 a 18.30 horas, tivo lugar a asemblea xeral da Conferencia, que se pechará oficialmente na xornada de hoxe.